Në aktakuzën e Prokurorisë Speciale për rastin e Rezervës Shtetërore, pasqyrohet në detaje presioni dhe ngutia që kishte ministrja Rozeta Hajdari, për ta bërë rezervën sekret.
Madje, njëri prej dëshmitarëve që është Rexhep Bllaca, kishte treguar se si e kishin thirrur në ‘gjysmë të natës’.
I akuzuari, zv/sekretari Irfan Lipovica, e kishte thirrur pas orarit të punës me kërkesën që kishte ardhur nga kabineti i ministres.
“Në vazhdim shton se po atë ditë diku rreth orës 20:00, kur kishte shkuar në zyrën e tij, kishin shkuar edhe zv.sekretari i përgithshëm Irfan Lipovica, dhe drejtori i Departamentit për Rezerva, Hafiz Gara, të cilët i kishin thënë se duhet të procedohet për në qeveri lënda për shmangien e procedurës së rregullt për blerjen e rezervave”, thuhet në dëshminë e dëshmitarit.
Sipas dëshmisë së tij, Lipovica që është i akuzuar në këtë proces, i kishte thënë se çështja është urgjente, dhe se ka të bëjë me siguri.
Urgjenca arriti deri në orën 22:00.
Ky dëshmitar kishte treguar se kërkesa u adresua në qeveri, dhe e njëjtae kishte miratuar.
Dëshmitari madje, e pranon se asnjëherë nuk ka ndodhur që rezervat të blihen në procedurë të negociuar, duke shmangur procedurën e rregullt.
