Kryeministri i Shqipërisë, Edi Rama, ka bërë të ditur se efektivët e Kontingjentit të XVII EOD të Forcave të Armatosura po marrin pjesë në stërvitjen ndërkombëtare “Exercise OAK Resolve” që po zhvillohet në Letoni.
Sipas Ramës, ushtarët shqiptarë janë të angazhuar në mbështetje të Brigadës Shumëkombëshe të NATO-s, me detyra reale që lidhen me asgjësimin e mjeteve të pashpërthyera (UXO) dhe hapjen e shtigjeve për lëvizjen e trupave.
“Angazhim që rrit ndërveprueshmërinë me forcat aleate dhe forcon kapacitetet operacionale të njësive tona në mjediset ndërkombëtare”, ka shkruar Rama në rrjete sociale.
Stërvitja, e cila përfshin trupa nga disa vende anëtare të NATO-s, ka për qëllim rritjen e gatishmërisë ushtarake dhe aftësisë për të vepruar në situata reale luftarake.
