Disa anëtarë të Kryesisë së Degës së Partisë Guxo në Pejë kanë bërë të ditur se kanë dhënë dorëheqje nga strukturat e kësaj partie, duke përmendur si arsye kryesore, sipas tyre, mungesën e mbështetjes ndaj Presidentes së Kosovës, Vjosa Osmani.
Në një deklaratë publike, ata theksojnë se Vjosa Osmani ka përfaqësuar Republikën e Kosovës me dinjitet dhe ka mbrojtur interesat shtetërore në çdo rrethanë. Sipas tyre, qëndrimi i degës së partisë në Pejë në raport me Presidenten është shqetësues dhe i papranueshëm.
Ish-zyrtarët e kësaj dege kanë shprehur gjithashtu kritika ndaj kryediplomates Donika Gërvalla, duke pretenduar se ajo ka lobuar kundër rizgjedhjes së Presidentes Osmani. Ata vlerësojnë se mungesa e përkrahjes brenda të njëjtit subjekt politik për një presidente që, sipas tyre, ka dëshmuar integritet dhe përkushtim ndaj shtetit, është e papranueshme.
Përmes kësaj deklarate, ata njoftojnë se në shenjë mospajtimi me këtë qasje kanë vendosur të largohen nga Partia Guxo në Pejë dhe të vazhdojnë mbështetjen për Presidenten Osmani në vendimet e saj të ardhshme.
Dorëheqjen e kanë nënshkruar Nezir Jahmurtaj, Ruzhdi Blakaj, Ramiz Cukaj dhe Feriz Gashi, të cilët kanë qenë anëtarë të Kryesisë së Degës së Partisë Guxo në Pejë dhe njëkohësisht anëtarë të Këshillit të Përgjithshëm të partisë.
Në deklaratë thuhet gjithashtu se vendimi për dorëheqje lidhet edhe me, siç shprehen ata, mosdorëheqjen e dy bashkëkryetarëve të partisë, Faton Peci dhe Donika Gërvalla.
