Rreth dy vite më parë, Edmond Lajqi ishte shpallur fajtor për dhunë ndaj bashkëshortes së tij Gjyljeta Ukellës.
Gjykata e kishte dënuar Lajqin, i cili sot vrau bashkëshorten e tij, me vetëm 400 euro gjobë.
Rasti i cili ka ndodhur në shtator të vitit 2021, ishte denoncuar në Polici nga vet Ukella, tregon aktakuza e Prokurorisë Themelore në Pejë.
Sipas dokumentit të aktakuzës, Lajqi akuzohej për dhunë psiçike të ushtruar ndaj Ukellës.
“Me datë 22.09.2021, rreth orës 17:40, në Pejë, pikërisht në shtëpinë e tij, ushtron dhunë psiçike ndaj bashkëshortes së tij, të dëmtuarës Gjyljeta Ukella”, thuhet në aktakuzë.
Lajqi, i cili ishte një burrë i papunë, e kishte ofenduar vazhdimisht Ukellën për tri-katër vite me radhë. Bazuar në aktakuzën e Prokurorisë, Lajqi i thoshte bashkëshortes së tij vëllai i saj ka synim ta ndajë nga ai.
“I pandehuri ka 3-4 vite vazhdimisht e ofendon me fjalë të dëmtuarën, duke i thënë se ‘ti je k*rvë, vëllai yt po don me të nda dhe me të martu me miqësinë e tij’, ‘gjysma e Pejës janë frajerat tu’ e shumë fjalë të tjera, ku e njëjta e lajmëron rastin në Polici”, thuhet në aktakuzë.
Bazuar në këtë aktakuzë, pas gjykimit, Gjykata Themelore në Pejë e kishte shpallur atë fajtor për dhunë në familje.
Ai ishte dënuar me 100 euro gjobë dhe me burgim prej 3 muajsh, por që pas kërkesës së tij ky dënim i ishte zëvendësuar me gjobë në shumë prej 300 eurosh.
Gjyljeta Ukella u vra mëngjesin e sotëm në banesën ku jetonte bashkë me familjen në Pejë.
Ajo la pas vetes tre fëmijë.
