Lëvizja Vetëvendosje, ndonëse del të jeta partia me më së shumti vota në vend, ka kandiduar vetëm një grua për zgjedhjet lokale të vitit 2025.
Nga kandidatët e certifikuar nga Komisioni Qendror Zgjedhor, Egzona Tërdevci, është kandidate e Lëvizjes Vetëvendosje për komunën e Drenasit.
Gazetarja Paulina Nushi Muhaxhiri, për Gazeta Blic, këtë fakt e ka quajtur siç thotë ajo “ flamur të kuq” për barazinë gjinore dhe shton se është tregues që demokaracia në Kosovë ende nuk e ka përfshirë seriozisht pjesëmarrjen e grave në nivelet vendimmarrëse.
“Fakti që partia më e madhe në vend, Lëvizja Vetëvendosje, ka kandiduar vetëm një grua për kryetare komune në zgjedhjet lokale të vitit 2025, për mua është një flamur i kuq për barazinë gjinore. Në asnjë nivel nuk është kuptuar ende se pjesëmarrja e grave në politikë është pjesë themelore e demokracisë moderne”, ka thënë Nushi Muhaxhiri.
Sipas saj, partitë politike, përfshirë edhe Vetëvendosjen, kanë tendencë të kandidojnë gra në komuna ku historikisht është shumë e vështirë të fitohet gara.
“Më duket pak e çuditshme por pothuajse të gjitha partitë kanë kandiduar kandidate gra në komunat ku ato e kanë më së vështiri të fitojnë garën për shkak të historisë së përzgjedhjeve të mëhershme apo kandidatëve që kanë përballë. Përjashto Natyra Kuçin kandidate për kryetare në komunën e Deçanit e cila po bën një fushatë të jashtëzakonshme”, shtoi ajo.
Nushi-Muhaxhiri theksoi se ky realitet është një mesazh i gabuar për gratë që dëshirojnë të merren me politikë, madje shton se edhe në rastet kur kandidohen gratë, të njëjtat nuk përkrahen nga lideerët e tyre gjatë fushatave zgjedhore.
“Përmes kësaj praktike po na thuhet se nuk jemi të denja si lidere për pozita drejtuese lokale. Unë në fakt edhe në fushatë si shoh gratë të përkrahura nga liderët e tyre për të bërë fushatë ‘’të egër’’ që bjen në syrin dhe veshin e qytetarëve”, theksoi ajo.
Paulina Nushi-Muhaxheri- Gazetare!
Ndërkaq, kandidatja e Lëvizjes Vetëvendosje për komunën e Drenasit, Egzona Tërdevci, për Gazeta Blic tha se kandidimi i saj është përgjegjësi e madhe, por nuk është bërë për shkak të gjinisë, por për shkak të angazhimit të madh.
“Është e vërtetë që jam gruaja e vetme që garon për kryetare komune nga Lëvizja Vetëvendosje dhe kjo sigurisht është përgjegjësi e madhe. Por kandidimi im nuk ka ardhur për shkak të gjinisë, ai ka ardhur si rezultat i një angazhimi të gjatë, i një rruge të bërë me shumë punë, me përfshirje në vendimmarrje dhe me besimin që e kam fituar përmes garës së brendshme,” tha Tërdevci për ‘GazetaBlic’.
Tërdevci shtoi se Drenasi ka nevojë për ndryshim dhe zhvillim të prekshëm në të ardhmen.
“Në një komunë si Drenasi unë e shoh kandidimin tim si një mundësi për të dëshmuar se lidershipi nuk ka gjini, por ka vizion, integritet dhe rezultat. Qytetarët nuk kërkojnë më vetëm traditën e vjetër, por kërkojnë zhvillim dhe ndryshim të prekshëm”, u shpreh Tërdevci.
Ndër të tjera, kandidatja e VV-së në Drenas theksoi se ajo nuk garon për të deshmuar se mund të fitojë në një bastion të burrave , por beson së puna e saj është alternativa e duhur për të udhëhequr komunën.
“Unë nuk garoj për të dëshmuar se një grua mund të fitojë në një bastion të burrave, por garoj sepse besoj se përvoja, puna ime dhe programi që ofroj janë alternativa e duhur për të udhëhequr komunën,” u shpreh kandidatja e VV-së për “Gazeta Blic”.
Egzona Tërdevci- Kandidate e LVV-së për Drenasin!
