Presidentja e Komisionit Evropian, Ursula von der Leyen, ka thënë se mbështetja për Ukrainën dhe ngritja e nivelit të përgatitjes së mbrojtjes evropiane janë dy prioritete kyçe për atë që njihet si Koalicioni i Vullnetit – një grup shtetet që po e synojnë rritjen e presionit ndaj Rusisë me qëllim që t’i japë fund luftës së saj ndaj Ukrainës.
Zyrtarja e lartë evropiane tha se u ka dhënë informacione të përditësuara presidentit ukrainas, Volodymyr Zelensky, dhe udhëheqësve të tjerë të koalicionit rreth këtyre prioriteteve, raporton televizioni BBC.
Plani për t’ia dhënë Ukrainës si hua asetet e ngrira ruse në formë të borxhit për dëmshpërblime është “kompleks”, thotë ajo, por një projekt i tillë do ta rrisë koston e luftës për Rusinë.
“Sa më shumë që e zgjat Putini këtë luftë, derdh gjak, merr jetë dhe e shkatërron infrastrukturën ukrainase – aq më e lartë do të jetë kostoja për Rusinë” – tha më tej politikania gjermane.
Ajo shtoi se lidhjet brenda Evropës janë “më të forta se kurrë më parë” dhe se vendet evropiane do të vazhdojnë të ecin tutje “të bashkuara, në mbështetje të Ukrainës dhe në mbrojtje të Evropës”.
Ndërkohë, presidenti ukrainas tha në rrjetin X se është mirënjohës për takimin me krerët evropianë dhe për përpjekjet që janë bërë për ta arritur paqen nga një front i unifikuar mes Evropës, Ukrainës dhe Shteteve të Bashkuara.
“Ai që është jetik sot është uniteti mes Evropës dhe Ukrainës, si dhe uniteti mes Evropës, Ukrainës e Shteteve të Bashkuara”, tha Zelensky, duke shtuar se të hënën “mbajti diskutime të hollësishme për punën tonë të përbashkët diplomatike me palën amerikane”./Nacionale
