Muzafer Lika, kushëriri i Muhamed Likës, zyrtarit policor të vrarë të martën në Kaçanik, tha se familja ende nuk ka informata për ngjarjen.
Ai, në një deklarim për portalin Indeksonline, tha se familjari i tij po kthehej nga puna kur u vra me armë zjarri në hyrje të banesës së tij të martën.
“Rasti na ka prekur shumë. E kemi dëgjuar shumë vonë mbrëmë. Ka ardhur papritur. As në mend nuk e kemi pasur, as nuk e kemi mendu që vjen vdekja te ai person. Ka qenë njeri i hareshëm, i lumtur me të gjithë.. çka ka ndodhë nuk e dimë as ne, as nuk mund të dyshojmë në kërkënd hiç”, tha ai.
“Besoj që organet e hetusisë do të merren dhe do ta zbulojnë rastin”, tha Muzafer Lika.
Kushëriri i rreshterit të vrarë tha se ai asnjëherë nuk është përfshirë në konflikt me askënd.
Ajo çfarë ai tha se di është se gruaja ishte personi i parë që e pa të plagosur rëndë familjarin e tyre.
“Prej punës ka qenë duke u kthy në orën 23:00 dhe gjatë hyrjes në banesë ka ndodhur rasti. Nuk e dimë se çka ka ndodhur aty, por e dijmë se kur ka dal nusja e tij e ka gjetur atë të plagosur rëndë”, ka thënë ai.
