Shtatori ashtu siç ishte paralajmëruar paralizoi jetën në shumë sektorë të shtetit në Kosovë, nxënësit mbetën në shtëpi e mësimdhënësit në grevë. Por jo vetëm mësimdhënësit, edhe shërbyesit civilë hynë në grevë, raporton Gazeta Online Veriu.info.
Siç e do zakoni, në vendin tonë gjithçka politizohet, pavarësisht realitetit që jo gjithçka e gjithkush është nën direktivën e kësaj apo asaj partie politike.
Me apo pa të drejt Sindikata e Bashkuar e Arsimit (SBASHK) është atakuar se dirigjohet nga partitë e pushtetit “20 vjeçar”, e këtë epitet si asnjëherë më parë e ka marrë ditët e fundit nga pushteti “i ri” i udhëhequr nga Vetëvendosje, shkruan Gazeta Online Veriu.info.
Gjithandej nëpër rrjete sociale hasim komente nga përkrahësit e anëtarët e partisë së Kurtit, duke e quajtur kryetarin e SBASHK-ut, Rrahman Jasharajn, njeri të PDK-së.
Por jo vetëm militantët politikë, edhe zyrtarë të lartë politikë nuk iu ndan këto ditë kësaj retorike duke e çuar deri në denigrim, duke e lidhur edhe me tradhëti kombëtare si anëtar i një partie serbe në vitet e 90.
Por asnjë militant e asnjë zyrtar i pushtetit aktual nuk e përmendi faktin që ka udhëheqës grevist që ishte përkrahës i Vetëvendosjes që dëshmohet nga profili i tij në Facebook.
Emri i përfaqësuesit të sindikatave të shërbyesve civilë, Ali Sefaj, nuk u atakua e as nuk u përmend si përkrahës i Vetëvendosjes.
Në një postim të 12 shkurtit 2021, vetëm 2 ditë para “referendumit popullor”, i quajtur kështu nga Albin Kurti e përkahësit e tij, Sefaj e çon në qiell kryeministrin në ardhje.
“1 komb, 2 shtete, 7 milionë shqiptarë në Ballkan, Albin Kurti kryeministër” – është posti i Sefajt.
Logjikshëm shtrohet pyetja: Pse VV nuk e zë në gojë për asnjë moment që Sefaj është përkrahës i kësaj partie, por kësaj radhe në kampin grevist?
Gjykojeni vet!
Kujtojmë që edhe pas masave të qeverisë Kurti për të mbështetur shumë sektorë publikë, grevat do të vazhdojnë e fatkeqësisht nuk e di askush kur do të përfundojnë!
