Kryetari i Komunës së Vushtrrisë, Ferit Idrizi, që vjen nga radhët e PDK-së, ka prezantuar aderimin më të ri në radhët e kësaj partie, Fidan Bejtën.
Idrizi ka bërë të ditur se Bejta do të jetë kandidat i PDK-së për asamblist në Kuvendin Komunal.
Ceremonia e aderimit të Fidan Bejta u zhvillua fshatin Smrekonicë, që është vendlindja e tij.
Fidan Bejta është djali i Nasuf Bejta, ish deputetit të LVV-GUXO, i cili edhe në zgjedhet e 9 shkurtit ishte kandidat i LVV-së për deputet.
Ndryshe, dje LVV ka prezantuar si për kandidat për kryetar komune, Sylejman Mehollin, por që 24 orë pas kjo parti mori goditjen e parë.
Postimi i Ferit Idrizi:
Mirë se vjen Fidan!
Jam shumë i lumtur që sot i bashkohet ekipit tonë një emër i njohur në komunën tonë, Fidan Bejta.
I lindur në fshatin Smrekonicë, Fidan Bejta vjen nga familja e njohur Bejta – një familje që ka mishëruar vlerat shqiptare ndër breza, me kontribut të pandalshëm para, gjatë dhe pas luftës. Ky trashëgim i përkushtimit ndaj atdheut dhe shoqërisë sot vazhdon me veprën e Fidanit.
Prej vitesh, Fidan Bejta është një figurë aktive në jetën publike dhe sociale. Ai njihet për angazhimin në ndihmë të familjeve në nevojë, promovimin e aktiviteteve sportive dhe kulturore për të rinjtë, si dhe nxitjen e bashkëpunimit dhe zhvillimit në nivel lokal.
Aktualisht, Fidani ushtron detyrën e kryetarit të Këshillit Lokal për fshatrat Smrekonicë, Dobërllukë, Pasomë, Bajskë, Sllatinë dhe Tërllobuq – një përgjegjësi të cilën e ka mbajtur me ndershmëri, qetësi dhe rezultate të prekshme për komunitetin që përfaqëson.
Përvoja e tij në sipërmarrje dhe komunikim me publikun është një vlerë e shtuar për ekipin tonë. Gjatë viteve, ai ka dëshmuar aftësi në menaxhim të përditshëm, organizim aktivitetesh dhe në ndërtimin e marrëdhënieve të drejtpërdrejta me qytetarët.
Përfshirja e Fidanit në listën tonë për Kuvendin Komunal përfaqëson zërin e njerëzve të ndershëm, punëtorë dhe të përkushtuar ndaj së mirës së përbashkët – një zë që i duhet politikës së sotme.
#përVushtrrinë
