Shefja e Grupit Parlamentar të Lëvizjes Vetëvendosje, Arbërie Nagavci ka bërë të ditur se dekreti për shpërndarjen e Kuvendit do të dërgohet në Gjykatën Kushtetuese.
Ajo në një konferencë për media ka thënë se ky është një akt i paprecedent që bie ndesh me rendin kushtetues.
“Jemi dëshmitarë që shpërndarja e Kuvendit sot paraqet një akt të paprecedent që bie ndesh me rendin tonë kushtetues dhe ne do ti drejtohemi Gjykatës Kushtetuese për këtë çështje. Nuk ka asnjë arsye pse duhej të ndodhte një akt i tillë sot”, tha Nagavci.
Nagavci tha se VV-ja ka qenë e përkushtuar për të shmangur zgjedhjet.
“Ne kemi pasur takime me partitë opozitare për të gjetur një zgjidhje të përbashkët. Kryeministri Kurti ka zhvilluar disa takime me radhë me kreun e PDK-së dhe LDK-së. PDK-ja insistonte se posti i presidentit u takon atyre, ndonëse kishin vetëm 22 vota në Kuvend. Kur u pyetën për emrin e kandidatit kanë refuzuar ta bëjnë publik duke kërkuar një nënshkrim blanco për një emër të cilin do ta bënin publik më vonë.
Edhe presidentja Osmani nuk i pranoi nënshkrimet e VV-së duke kërkuar që kandidatura e saj të ndodhte vetëm me garantim të rezultatit të votave të të gjithë deputetëve tanë. Opozita nuk pranoi as opsionin e ndryshimeve kushtetuese”, tha Nagavci.
