Paul Williams pohoi se gjatë kohës në Rambuje, Hashim Thaçi, ishte sjellë në mënyrë diplomatike dhe respektuese ndaj Bujar Bukoshit.
Williams, i cili ishte këshilltar ligjor i delegacionit të Kosovës gjatë negociatave në Rambuje më 1999, e nisi dëshminë e tij për mbrojtjen e ish-presidentit të Kosovës, Hashim Thaçi, të mërkurën para Dhomave të Specializuara të Kosovës në Hagë.
“E di që është sjellë kështu. Në qoftë se doni, mund t’iu jap informacion shtesë”, tha Williams, e që informacioni shtesë nuk iu kërkua nga Prokuroria.
Por, ndryshe nga Williams, në një intervistë, Veton Surroi kishte thënë se Thaçi e kishte kërcënuar Bukoshin. Madje, duke i hedhur kafe.
Surroi kishte thënë se ka pasur mosmarrëveshje dhe në një pikë situata ishte bërë e komplikuar dhe filluan akuzat që “ti ke bërë këtë, LDK-ja kështu-ashtu”.
Avokati Luka Mishetiq pati kritika për këtë pjesë, duke thënë se atyre iu është thënë për dy vite nga gjykatësit që të mos shfaqin në ekran dokumente të kësaj natyre. Prokurori James Pace tha se nuk është shfaqur në ekran. Pas kësaj, ndërhyri trupi gjykues duke i thënë prokruorit që ta lë të flasë avokatin.
“Unë kundërshtoj se po zbatohen standarde krejtësisht të ndryshme. Keni zbatuar tjetër standard me Prokurorinë”, tha Mishetiq.
Gjyqtari tha se nuk kanë zbatuar standard tjetër me Prokurorinë.
Mishetiq u shpreh se Prokuroria po përdorë një dokument që nuk i është lejuar që ta përdor. Ndërsa, gjyqtari tha që nuk kanë marrë vendim për këtë.
Avokati tha se atyre nuk iu është lejuar që t’i tregojnë dëshmitarit këso lloj të dëshmive gjatë marrjes në pyetje. Gjyqtari Mettraux tha se i kanë lejuar por që u kanë thënë se të jenë zgjedhje e dytë dhe jo e parë përdorimi i tyre.
Mishetiq tha se kundërshtimi i tij është që të mos iu kishte treguar në ekran dëshmitarit ky dokument./BetimipërDrejtësi/
