Një vërshim enorm i komenteve me fotografitë e Granit Xhakës, Xherdan Shaqirit, UÇK-së dhe flamujve të Kosovës e Shqipërisë, ka ndodhur në faqen zyrtare në “Facebook” të Federatës së Futbollit të Serbisë.
Fitorja emblematike e djeshme e Zvicrës ndaj Serbisë, ka bërë që një popull i tërë shqiptar të ndihet krenar me Granit Xhakën dhe Xherdan Shaqirin, pas provokimeve të shumta që hasën nga serbët, si dhe përgjigjën tejet bravoroze që ua dhanë në fushë, duke i mposhtur.
Kështu, reagimi i madh nuk ka munguar edhe në rrjetet sociale. Shqiptarët kanë vërshuar me komente patriotike edhe faqen zyrtare në “Facebook” të Federatës së Futbollit të Serbisë.
Mijëra komente nga më të ndryshmet, duke publikuar fotografi të UÇK-së, Xhakës, Shaqirit dhe flamujve të Kosovës dhe Shqipërisë, kanë pushtuar faqen zyrtare të Federatës serbe.
Kujtojmë se deliri me rastin e fitores të Zvicrës ishte grotesk edhe rrugëve të qyteteve të Kosovës.
