Gjatë mesit të nëntorit të vitit 2019, mijëra anglezë zbarkuan në rrugët e Prishtinës për të mbështetur Kombëtaren e Anglisë që do të luante kundër Kosovës në “Fadil Vokrri” në kuadër të eliminatorëve të Kampionatit Europian. Por, ajo që nuk prisnin ata ishte mikpritja e paprecedentë që do të pranonin nga kosovarët. Njëri ndër ta ishte edhe gazetari i mirënjohur Simon Peach.
Simon Peach, i cili mbulon klubin gjigant të Manchester United dhe Kombëtaren e Anglisë, e kishte shijuar në maksimum vizitën e tij në Kosovë dhe kishte mbetur i shtangur nga mikpritja e vendasve. Për këtë përvojë, zoti Peach ka folur ekskluzivisht për Gazetën Metro.
Kur u pyet se çka i kishte bërë përshtypje më së shumti për Kosovën, ai tha: “Ngrohtësia e njerëzve. Të kesh një pasaportë britanike më jep privilegjin të udhëtoj shumë më lehtë se shumë njerëz, por shumë njerëz – shpesh kuptohet – i shohin vizitorët anglezë si një dhimbje.”
“Por në Kosovë na bënë të ndiheshim si në shtëpinë tonë që nga ulja në aeroport. Kjo ndjesi vazhdoi gjatë gjithë kohës sonë atje dhe mbetet shumë e pazakontë në të gjitha udhëtimet e mia”, vazhdoi më tej Simon Peach.
Ai për Gazetën Metron foli edhe për mënyrën se si i kaloi ditët e tij në Prishtinë, duke pëmendur edhe disa nga vendet më interesante të qytetit që kishte vizituar.
“Më pëlqen të shoh vende në këmbë, kështu që ecja sa më shumë që munda. Kisha dëgjuar për statujën e Bill Clintonit kështu që shkova atje, pastaj shëtisja nëpër galeri, kisha, xhami dhe aq sa munda në Prishtinë. Më pëlqeu edhe jeta juaj e natës”, tha shefi i futbollit në agjencinë kombëtare të lajmeve për Mbretërinë e Bashkuar dhe Irlandë, PA Media.
Ndërsa, kur u pyet se si ishin njerëzit e Prishtinës, Peach u shpreh kështu: “Shumë të ngrohtë dhe miqësorë – nga restorantet e picave te baret, nga punëtorët e stadiumit te shoferët e taksive. Ishin disa ditë vërtet të këndshme në një vend që shpresoj ta vizitoj përsëri.”
Ato ditë e gjithë Prishtina ishte veshur me flamujt anglezë të Shën Gjergjit dhe me banerët e shumtë ku shkruhej “Mirësevini dhe respekt”, duke iu referuar futbollistëve dhe tifozëve të Anglisë.
Ndeshja e shumëpritur më 17 nëntor megjithatë nuk ishte e lehtë për Kosovën e Bernard Challandes. Ndonëse në Saint Mary’s Kosova shënoi 3 gola dhe ia bëri paksa më të vështirë fitoren Anglisë, në Prishtinë ishte një tregim krejt tjetër.
Djemtë e Gareth Southgate fituan me rezultat të thellë 4-0, por ajo natë do të jetë e paharrueshme për mijëra tifozë kosovarë që kishin fatin të shihnin nga afër yjet e futbollit si Harry Kane, Raheem Sterling e Marcus Rashford.
E paharrueshme padyshim do të mbetet edhe vizita pakditore e mijëra tifozëve anglezë, përfshirë zotin Peach, që kishin shijuar plotësisht kohën e tyre të shkurtë në Prishtinë, duke i dhënë kështu qytetit një gjallëri të paparë./gazetametro.net
