Mediet spanjolle kanë nxjerrë fakte të reja në lidhje me Alfred Prodanin ish-drejtori i ujësjellësit në Kurbin, i cili është arrestuar nën dyshimet se ka grabitur shtëpinë e Karim Benzemas.
Sulmuesi francez u bë viktimë e sulmit më 27 shkurt 2019, teksa luante një El Clasico kundër Barcelonës në “Santiago Bernabeu”, sfidë e vlefshme për gjysmëfinalen e Kupës së Mbretit.
Benzema u lajmërua menjëherë pas ndeshjes se në shtëpinë e tij kishte ndodhur një grabitje e dhunshme. Autoritetet pretendojnë se pas kësaj ngjarjeje qëndron Prodani, i cili mbante postin e drejtorit të ujësjellësit në Kurbin.
“Arrestohet zyrtari i lartë i qeverisë shqiptare për grabitjen e shtëpisë së Benzema“, shkruan iberikja AS, teksa raporton se Prodani akuzohet se ka grabitur me dhunë edhe mbi 40 shtëpi të tjera në tokën spanjolle prej vitit 2013.
41-vjeçari u arrestua në qytetin e Laçit nga policia në një operacion të koordinuar nga Interpoli pas një hetimi nga një gjykatë në A Coruna, dhe tani pritet të ekstradohet në Spanjë, sipas marrëveshjes që arritën kohë më parë kryeministrat Edi Rama dhe Pedro Sanchez.
Prodani mund të ekstradohet në Spanjë për t’u gjykuar së bashku me pjesën tjetër të bashkëpunëtorëve të tij të dyshuar. Mes tyre është edhe një biznesmen i njohur shqiptar emri i të cilit për momentin nuk bëhet i ditur. Shtypi vendas detajon vetëm se ai është 37 vjeç dhe ka disa kompani të rëndësishme.
Për rastin e drejtorit të ujësjellësit ka reaguar edhe kryetari i partisë Aleanca Kuq e Zi, Kreshnik Spahiu.
“Ai i vjedh shtëpinë Benzemasë dhe e emërojnë drejtor. Nëse ia del të grabisë Leo Messin, e bëjnë menjëherë ministër”, ka thënë me ironi Spahiu.
