Zëdhënësi i KEDS-it, Viktor Buzhala në një intervistë për “Info Magazinën” në Klan Kosova ka thënë se kanë dërguar deri në 5 mijë lëndë brenda vitit në gjykatë për vjedhje të rrymës.
Por, sipas tij rreth 80 për qind e këtyre lëndëve nuk janë shqyrtuar fare.
“Ky duhet të jetë alarm më tepër për gjykata, KEDS-i e ka kryer pjesën e vet sa ka mundur dhe ku ka mundur, vazhdimisht jemi në aksione, i dërgojmë me mijëra lëndë, deri në 5 mijë lëndë brenda vitit i kemi dërguar në gjykata sa i përketë vjedhjes së energjisë elektrike dhe prej tyre diku 80 për qind nuk janë shqyrtuar fare”, tha ai.
Buzhala është shprehur se rryma më së shumti vidhet në rajonin e Mitrovicës.
“Më së keqi në këtë aspekt qëndron rajoni i Mitrovicës, pastaj edhe një pjesë e Deçanit dhe Drenicës nuk është se i kanë punët mirë, ka qenë Podujeva problematike një kohë të gjatë, por fatmirësisht është rregulluar, Kodra e Trimave në Prishtinë ka qenë problematike, mirëpo është përmirësuar ndjeshëm, pra kemi punuar vazhdimisht që kjo të përmirësohet, jemi duke e rregulluar këtë sistem, por hajnitë duhet të luftohen më të shumti nga organet rendit dhe të drejtësisë”, u shpreh tutje ai.
