Presidenti i Ukrainës, Volodymyr Zelenskyy, tha se ka biseduar me presidentin amerikan Donald Trump lidhur me nevojën për të forcuar mbrojtjen ajrore të Ukrainës, në kohën kur sulmet ruse ndaj qyteteve ukrainase po intensifikohen.
Në një njoftim të shkurtër për bisedën telefonike, të publikuar në Telegram, Zelenskyy tha se presidenti amerikan ishte “shumë mirë i informuar” për situatën në Ukrainë. Sipas tij, të dy diskutuan për “mundësitë në fushën e mbrojtjes ajrore dhe ranë dakord që të punojnë për forcimin e mbrojtjes së qiellit”.
Ai bëri të ditur se kanë rënë dakord që të organizojnë një takim të veçantë ndërmjet ekipeve të tyre për këtë çështje.
Zelenskyy shtoi se gjatë bisedës është diskutuar edhe për mundësitë e bashkëprodhimit të armëve, duke theksuar: “Jemi të gatshëm për projekte të drejtpërdrejta me Amerikën”, si dhe për blerje dhe investime të përbashkëta të mundshme, njofton The Guardian.
Presidenti ukrainas gjithashtu përcolli urimet e tij me rastin e Ditës së Pavarësisë së SHBA-së, duke falënderuar për mbështetjen që Ukraina ka marrë deri më tani.
“Kemi bërë shumë së bashku me Amerikën dhe mbështesim çdo përpjekje për të ndalur vrasjet dhe për të rikthyer paqen normale, të qëndrueshme dhe dinjitoze. Për paqe nevojitet një marrëveshje e ndershme, dhe Ukraina mbështet propozimet amerikane”, u shpreh ai.
