Gjykata Kushtetuese ka interpretuar se e drejta për të propozuar Kryetarin e Kuvendit i takon subjektit politik me numrin më të madh të deputetëve pas zgjedhjeve. Megjithatë, sipas njohësit të mirë të punës së Kuvendit, Albert Krasniqi, Kushtetuesja nuk ka përcaktuar qartë nëse kjo e drejtë mbetet e vlefshme edhe në rast se subjekti nuk paraqet një kandidat për këtë pozitë.
Krasniqi ka rikujtuar rastin e vitit 2014, kur Partia Demokratike e Kosovës (PDK) kishte propozuar Agim Aliun si kandidat për Kryetar të Kuvendit. Ai thekson se bllokimi i institucioneve nuk është i lejuar nga Kushtetuta, njësoj siç nuk ishte lejuar monopoli në rastin e propozimit të mandatarit për Kryeministër.
“Një e drejtë që nuk ushtrohet, humbet. Prandaj, një interpretim i mëtejshëm nga Gjykata Kushtetuese për situatën kur nuk propozohet kandidat brenda një afati të arsyeshëm, nuk duhet të përjashtojë mundësinë që kjo e drejtë t’i kalojë një subjekti tjetër politik që ka numrat për të zgjedhur Kryetarin e Kuvendit”, ka deklaruar Krasniqi.
