Policia e Kosovës është ndër institucionet më të besueshme nga qytetarët e Kosovës, besim të cilin e kanë fituar me punë e profesionalizëm që prej themelimit e deri më sot. Por sikurse edhe në organizata apo institucione tjera shtetërorë, jo gjithëherë punonjësit e tyre zbatojnë rregullat e përcaktuara me akte ligjore që e rregullojnë marrëdhënien e tyre të punës.
Veriu.info ka hulumtuar çështjen e rregullave të sjelljes së zyrtarëve policor në publik, duke gjetur se zyrtarë të caktuar policisë nuk po i zbatojnë aktet e brendshme të këtij institucioni që rregullojnë çështjen e bartjes së uniformës.
Një shkrim i ilustruar me fotografi nga Veriu.info më datën 3 shkurt 2024, ku raportohej se si zyrtarë policor në Mitrovicë gjatë patrullimit nuk bartnin kapelat, edhe pse e kanë obligim ligjor, kishte ngjalluar reagime të shumta.
Për të qenë sa më korrekt me lexuesit dhe standardet e gazetarisë pas reagimeve, Veriu.info kishte drejtuar pyetje në adresë të policisë së Kosovës, duke i pyetur se “Ne baze te rregullatives ligjore, a e kane obligim ligjor zyrtaret policor te njesive patrulluese qe ta mbajne ne kokë te vendosur kapelen policore gjate punes se tyre ne terren?”
Në këtë pyetje përgjigja e policisë ka qenë konkrete, ku thuhet se zyrtarët policor duhet të bartin kapelën.
“Referuar kërkesës suaj ju njoftojmë se standardet e uniformës për zyrtarët policorë janë të përcaktuara me dokumentet e brendshme të Policisë së Kosovës si Rregulloren për Administratë dhe Personel si dhe Udhëzimin Administrativ për Marrëdhënie të Punës dhe gjatë detyrës zyrtare, uniforma përfshirë edhe kapela duhet të bartet bazuar në këto standarde”, thuhet në përgjigjen e Policisë së Kosovës për Veriu.info.
(Veriu.info do të vazhdoj monitorimin e zbatimit të rregullativës ligjore, që obligon zyrtarët policor ta vendosin në kokë kapelën gjatë punës në terren)
Telefoni kontaktues i Inspektoratit Policor: 080003333
