Në kohën kur Kuvendi i Kosovës ende s’po arrin të konstituohet pas zgjedhjeve të 9 shkurtit, ambasadorët e vendeve të QUINT-it kanë zhvilluar një takim të pazakontë sot në ndërtesën e Qeverisë me kryeministrin në detyrë, Albin Kurti.
Në oborrin e Kryeministrisë janë parë ambasadori i Francës, Olivier Guerot, ai i BE-së, Aivo Orav, si dhe ambasadori i Britanisë së Madhe, Jonathan Hargreaves, të cilët u larguan pa dhënë asnjë koment për mediet. Pak minuta më vonë, u pa edhe vetura e ambasadorit gjerman, Jorn Rohde, e cila qëndroi pak më gjatë përpara objektit qeveritar, por pa ndonjë shenjë deklarimi.
Kjo vizitë e heshtur vjen pas një varg dështimesh për ta konstituuar legjislaturën e re të Kuvendit, ndërsa Lëvizja Vetëvendosje e Kurtit ende nuk ka arritur t’i sigurojë votat e mjaftueshme për të zgjedhur kryetarin e ri të Kuvendit.
Fillimisht, VV propozoi Albulena Haxhiun për këtë post, por u përball me refuzimin e opozitës. Seanca u zvarrit dhe përfundoi në ngërç procedural, pasi dështoi edhe miratimi i Komisionit për votim të fshehtë, të propozuar nga kryesuesi i seancës, Avni Dehari.
E ndërkohë që rrëmuja parlamentare po thellohet, Aleanca për Ardhmërinë e Kosovës i është drejtuar sot Gjykatës Kushtetuese. AAK ka kërkuar vlerësimin e kushtetutshmërisë së vendimeve të Kuvendit për konstituimin e legjislaturës së nëntë, duke vënë në pikëpyetje edhe vetë votimin e fshehtë për kreun e tij.
Në mungesë të veprimeve të qarta nga brenda, duket se shtetet e QUINT-it kanë vendosur ta marrin pulsin nga afër. Por, çfarë do të thotë kjo heshtje e tyre? Heshtje para stuhisë, apo thjesht zhgënjim diplomatik?
A do të ndërhyjnë në ditët në vijim? Kjo mbetet për t’u parë.
