Kryetari i komunës së Ferizajit nga PDK, Agim Aliu, edhe pse është në fund të mandatit nuk realizoi fare hiq më pak se 13 premtime që i kishte dhënë gjatë fushatës së vitit 2021, raporton Gazeta Online Veriu.info.
Aliu kishte premtuar një Ferizaj me më shumë gjelbërim, shkolla dhe stadiume sportive, por pas katër vitesh ende nuk ka filluar realizimi i këtyre projekteve.
Aliu në vitin 2021 kishte bërë gjithsej 69 premtime në programin e tij elektoral. Sipas një hulumtimi të publikuar nga Instituti GAP, nga këto premtime vetëm 39 janë realizuar plotësisht, 9 janë në gjysmë realizimi, 8 kanë filluar të implementohen, ndërsa 13 premtime nuk kanë nisur fare.
13 premtimet e Aliut që nuk kanë filluar fare të realizohen janë: Zvogëlimi i borxhit të palëve ndaj komunës, digjitalizimi i shërbimeve komunale, krijimi i shkollës së sportit, shndërrimi i dy objekteve të reja shkollore për mësim tërë ditor, krijimi i parqeve zhvillimore për biznese, mbikalimi në kryqëzimin e rrugës “Brahim Ademi” dhe “Driton Islami”, ndërlidhja e Ferizajt me gypin e gazit nga Maqedonia e Veriut deri në Kosovë, investim nga Bashkimi Evropian, stadium i ri i futbollit “Ismet Shabani” te kompleksi i sporteve, Salla e sporteve luftarake, Mbrojtja e zonave arkeologjike dhe hapja e zonave të reja arkeologjike, Rregullimi i parkut te zona “Gjon Serreqi”, Ndërtimi i parkut në hapësirat e e ish stacionit të autobusëve, Zgjerim i parkut në Rahovicë./Veriu.info/
