Sot bëhen 14 vjet që kur u nda nga jeta avokati dhe veprimtari i njohur mitrovicas Bajram (Sinan) Kajtazi, një figurë që la gjurmë në jetën juridike, politike dhe shoqërore të Mitrovicës.
Bajram Kajtazi u lind më 14 qershor 1949 në Zasellë. Fillimisht kishte përfunduar Shkollën Normale, duke u përgatitur për profesionin e mësuesit. Pas përfundimit të studimeve, ai punoi si mësues në fshatin Bistricë, ndërsa më vonë edhe në Sibovc të Obiliqit.
Megjithatë, rruga e tij profesionale mori një drejtim tjetër. Ai vazhdoi studimet në drejtësi dhe u bë jurist, duke u dalluar më pas si avokat, profesion që e ushtroi me përkushtim dhe integritet për shumë vite.
Në vitet e tetëdhjeta, kur në Kosovë zhvilloheshin procese të mëdha politike dhe shqiptarët kërkonin realizimin e të drejtave të tyre politike dhe kombëtare, Bajram Kajtazi ishte ndër zërat e angazhuar kundër politikave represive të regjimit serb. Për shkak të angazhimit të tij politik kundër përpjekjeve të regjimit të Slobodan Millosheviqit, ai u dënua me burg në vitin 1986 nga regjimi i atëhershëm.
Pas daljes nga burgu, ai vazhdoi angazhimin e tij profesional dhe shoqëror. Në vitet më të vështira për Kosovën dha kontribut të rëndësishëm në Lidhjen Demokratike të Kosovës, duke qenë një ndër themeluesit e LDK-së në Mitrovicë dhe duke kontribuar në organizimin politik dhe qytetar të kohës.
Në fundvitet e 90-ta, Bajram Kajtazi ishte futur në listën e likuidimit nga regjimi serb dhe kërkohej kudo për t’u vrarë, siç u bë me shokët e tij të idealit. Ai ishte radhitur i 9-ti në këtë listë prej mbi 60 veprimtarësh në Mitrovicë.
Përveç aktivitetit politik, ai ishte aktiv edhe në jetën humanitare. Në vitet ’90 ishte aktivist i Shoqatës humanitare “Nëna Terezë”, ndërsa pas luftës në Kosovë për një kohë të shkurtër shërbeu edhe si kryetar i Kryqit të Kuq të Kosovës për Mitrovicën.
Për një periudhë ai ishte edhe përfaqësues i qytetarëve në Kuvendin Komunal të Mitrovicës.
Bajram Kajtazi ishte gjithashtu edhe sportist i dalluar. Ai e donte shumë futbollin dhe gjatë rinisë ishte ndër futbollistët më të mirë të Klubit të Futbollit “Bair”, i cili garonte në ligat ndërkomunale.
Ata që e njohën e kujtojnë si një njeri të drejtë, të guximshëm dhe të përkushtuar ndaj profesionit, familjes dhe çështjeve të vendit të tij.
Bajram Kajtazi ndërroi jetë më 30 mars 2012, ndërsa u varros në varrezat e Zasellës, duke lënë pas kujtimin e një njeriu që i shërbeu me përkushtim shoqërisë dhe vendit të tij.
