Kryeprokurori i Prokurorisë Themelore të Prizrenit, Petrit Kryeziu, ka dhënë detaje për operacionin e gjerë lidhur me keqpërdorimin e mbi një milion eurove në Byronë Kosovare të Sigurimit.
Kryeziu në një konferencë për media ka bërë të ditur se 39 persona kanë rënë nën pranga, teksa shtatë nga ta gjenden jashtë Kosovës, të cilët do të japin përgjegjësi penale.
“Ne kemi arritur t’i arrestojnë 39 persona dhe t’i ndalojmë të njëjtit, përderisa 7 prej tyre rezultojnë që janë jashtë Kosovës. Mirëpo, veprimet hetimore nuk do të nadlen edhe në drejtim të tyre. Ne do të kujdesemi që në kuadër të mandatit që kemi, të sigurohemi që BKS-në ta kompensojmë cent më cent, prandaj kemi sekuestruar dhe ngrirë pasuri edhe më shumë sesa ata që kanë ngrirë“, ka thënë ai.
Kryeziu ka bërë të ditur se personi juridik që është nën hetime ka lidhje me ish-drejtorin e BKS’së, Sami Mazreku dhe ish-drejtori i departamentit të Financave, Valon Berisha.
“Personi juridik është jashtë Byrosë, por ka të bëjë me dy persona kryesorë që dyshohet se kanë hapur këtë person juridik si konsulencë dhe mendojmë se të hollat kanë kaluar në këtë pjesë, mirëpo është fazë të hershme që të japim detaje“, ka thënë ai.
Sipas tij, deri tani janë siguruar 166 transaksione të dyshimta, mes tyre 25 transaksione kanë të bëjnë me 12 persona me të cilët kanë arritur ujdi fiktive jashtëgjyqësore- kinse për përfaqësim si të autorizuar si përfaqësues të personave që ma herët kanë pasur aksidente në komunikacion dhe i kanë kompensuar në vitet 2022-2023, përderisa personat tjerë vecse kanë qenë të kompensuar qysh më 2016-2017.
“Po ashtu, kanë aplikuar edhe 141 transaksione të ndryshme te persona të ndryshëm, pa asnjë dokument të vetëm dhe kanë bartur shuma të ndryshme. Shuma më e vogël e transaksionit ka qenë 6 mijë e 800 euro, përderisa më e larta 68 mijë euro”, tha Kryeziu.
Buxheti i Byrosë së Sigurimeve krijohet nga të hyrat që i dërgojnë kompanitë private të sigurimeve përmes policave të obligueshme të sigurimitë të vetuarve që çdo kosovar që ka në pronësi veturën është i obliguar ta paguajë.
