Veriu.info ka raportuar ekskluzivisht për emrat e 28 kompanive që Agjencia e Ushqimit dhe Veterinarisë ua kishte pezulluar lejet e importit të kafshëve të gjalla, pasi që kanë shkelur rregullativën ligjore.
Në mesin e 28 kompanive që kanë bërë shkelje ligjore, duke mos i therur kafshët e importuara brenda 72 orësh siç e kishin obligim ligjor, është edhe “XHDG Company” Sh.P.K. me pronar Xhevdet Spahiu dhe adresë në Podujevë.
Në vendimin për pezullim të lejes të nxjerrë nga AUV, që Veriu.info i ka siguruar përmes Ligjit për Qasje në Dokumente Publike, shkruan se “XHDG Company” Sh.P.K. me pronar Xhevdet Spahiu gjatë periudhës janar – mars 2025 ka importuar 552 krerë gedhe, të cilat duhet të ishin therur brenda afatit kohor prej 72 orëve në thertore të licencuar, por që kjo kompani e ka therur vetëm 1 krerë, përderisa 551 gedhe nuk dihet se ku kanë përfunduar, me çka kanë bërë shkelje të akteve ligjore në fuqi.
“XHDG Company” Sh.P.K. pas vendimit për pezullimit të lejes së importit ka bërë një ankesë në AUV, ku përmbajtja e saj do të duhej të ishte material i mjaftueshëm për Prokurorinë e Kosovës që të nis hetime zyrtare, pasi që kjo kompani e pranon që kafshët nuk i ka therur, por i ka shitur personave juridik dhe qytetarëve fizik, ani pse ato do të duhej të thereshin brenda 72 orësh prej momentit të futjes në Kosovë në thertoren që kjo kompani e ka të lajmëruar në AUV.
Përkundër që AUV i ka pezulluar lejen e importit për shkelje f ragrante dhe faktit që vet kompania e pranon që kafshët i ka shitur, Komisioni i Ankesave i AUV pas shqyrtimit të ankesës rekomandon kthimin e “XHDG Company” Sh.P.K. me pronar Xhevdet Spahiu në regjistrin e sistemit FCMS dhe TRACES, që nënkupton kthimin e lejes së importit.
Mirëpo, siç shihet në dokument, raportimin për rekomandimin e kthimit të lejes së importit për këtë kompani nuk e ka nënshkruar anëtari i Komisionit, Mehdi Latifi.
Mos zbatimi i rregullativës ligjore për therjen e kafshëve të importuara brenda 72 orësh nga kompanitë importuese, shmang kontrollin e inspektorëve të AUV në lidhje me shëndetin e kafshëve dhe hap mundësinë kompanive që ato t’i therin ilegalisht apo t’i shesin, ku për pasojë vjen edhe deri të mundësia e evazionit fiskal dhe rrezikimit të shëndetit të konsumatorëve të mishit./Veriu.info
