Po e përfundon mandatin e kryetarit të komunës, por Përparim Rama për katër vite qeverisje nuk ka arritur të fillojë realizimin e hiq më pak se 59 premtimeve që i kishte dhënë gjatë fushatës së vitit 2021, raporton Gazeta Online Veriu.info.
Rama në vitin 2021 kishte bërë gjithsej 206 premtime në programin e tij elektoral. Sipas një hulumtimi të publikuar nga Instituti GAP, nga këto premtime vetëm 73 janë realizuar plotësisht, 37 janë në gjysmë realizimi, 37 kanë filluar të implementohen, ndërsa 59 premtime nuk kanë nisur fare.
Në mesin e premtimeve të Përparim Ramës që kanë mbetur në letër janë edhe 3 shkolla të reja që ai kishte premtuar në vitin 2021.
Ndërtimi i shkollës në lagjen “Kroi i njelmët”, ndërtimi i shkollës në lagjen “Kodra e Trimave” dhe shkolla “Liceu Artistik” i cili përfshin: drejtimin e muzikës dhe baletit, artit dhe dramës dhe gazetarisë kanë mbetur premtime në letër e të cilat Pëparim Rama për këto 4 vite as nuk i ka filluar se lëre më t’i realizojë.
