MAPL ka ndarë gjysmë milioni euro për projektet e OJQ-ve në fushën e qeverisjes lokale. Mirëpo, në listën zyrtare të rezultateve të publikuar më 8 qershor, ministria ka vendosur të mos bëjë publike asnjë emër të organizatave dhe asnjë shifër se sa para ka marrë secila prej tyre nga buxheti i shtetit.
Ministria e Administrimit të Pushtetit Lokal e udhëhequr nga ministri në detyrë Elbert Krasniqi, ka publikuar rezultatet e fazës së vlerësimit përmbajtësor për Thirrjen Publike për Mbështetje Financiare të Projekteve dhe Programeve të Organizatave Jo-Qeveritare në fushën e qeverisjes lokale, por pa bërë publike emrat e organizatave që kanë kaluar në këtë fazë dhe pa treguar se sa para pritet të përfitojë secila prej tyre.
Sipas dokumentit të publikuar nga ministria, gjithsej 11 projekt-propozime kanë kaluar fazën e vlerësimit përmbajtësor, ndërsa dy të tjera janë refuzuar. Megjithatë, në listën e publikuar nuk figuron asnjë emër organizate.
Në vend të emrave, MAPL ka publikuar vetëm numra protokolli, duke e bërë të pamundur për publikun të kuptojë se cilat OJQ po garojnë për fondet publike dhe cilat janë eliminuar nga procesi.
Ndërkohë, e njëjta ministri që udhëhiqet nga Elbert Krasniqi ka publikuar edhe listën e aplikacioneve që nuk kanë kaluar fazën e vlerësimit administrativ, por sërish vetëm me numra protokolli dhe pa bërë publike emrat e organizatave. Në këtë listë figurojnë 20 projekt-propozime të refuzuara, duke e vazhduar praktikën e fshehjes së identitetit të OJQ-ve pjesëmarrëse në procesin e ndarjes së fondeve publike.
Sipas dokumenteve zyrtare të thirrjes publike, vlera e tërësishme e planifikuar për këtë fond kap shifrën prej saktësisht 500,000.00.
MAPL-ja kishte paraparë që me këto para të financonte deri në 10 projekte, ku shumat e ndara për një projekt individual do të lëviznin nga 30,000.00 e deri në 80,000.00.
Megjithatë, në listën përfundimtare të fazës përmbajtësore figurojnë 11 projekte që kanë kaluar me sukses – duke tejkaluar numrin maksimal të projekteve të planifikuara fillimisht./Insajderi
