Mandati i dytë i Bali Muharremajt si kryetar i Komunës së Suharekës po hyn në ditët e fundit, ndërkohë që zgjedhjet e reja lokale janë në prag. Në vend që ky mandat të mbyllej me rezultate të dukshme, ai po përmbyllet me shumë premtime të pambajtura, të cilat kanë mbetur vetëm fjalë të shkruara në letër
Nga gjithsej 78 premtime të dhëna për mandatin 2021-2025, sipas Instituti GAP vetëm 27 janë përfunduar, 8 janë gjysmë të realizuara, 13 janë në proces, ndërsa plot 30 premtime nuk kanë filluar fare.
Dhe këto nuk janë projekte të vogla, por zotime madhore që preknin drejtpërdrejt jetën e qytetarëve, ekonominë, mjedisin, arsimin, sportin dhe imazhin e qytetit.
Në mesin e këtyre 30 zotimeve të parealizuara është ndërtimi i objektit të ri komunal dhe krijimi i sistemit digjital për gjendjen civile. Premtimi për bashkëpunim me IKAF për certifikimin e studentëve të ekonomisë nuk ka nisur, ashtu siç nuk kanë nisur bursa e stimulime për të rinjtë e Suharekës.
Në letër mbetën edhe idetë për zhvillimin e turizmit malor, licencimin e staneve dhe fermave mikpritëse, funksionalizimin e agrozonës në Samadrexhë dhe ndërtimin e shtëpive malore për akomodimin e turistëve.
Po ashtu, nuk u realizua ndarja e 5 hektarëve tokë në Parkun Ekonomik të Shirokës për shërbimet emergjente dhe ndërmarrjet publike. Nuk ka nisur as projekti për trajtimin e ujërave industriale në zonën industriale, ndërkohë që as premtimi për fasadimin dhe ngjyrosjen e qytetit nuk u prek kurrë.
Edhe sporti nuk përfundoi më mirë: klubi “Ballkani” nuk mori hapësirat e premtuara, ndërsa klubi i basketbollit “Ylli” nuk pa asnjë hap drejt palestrës së re.
Në fushatë u tha se bizneset do të përfitonin lehtësime tatimore për çdo punëtor të ri të punësuar, por kjo mbeti një tjetër rrenë elektorale. Po aq boshe rezultuan edhe zotimet për startup-et, freelancing-un, restaurimin e trashëgimisë kulturore, anëtarësimin në UNESCO dhe krijimin e Drejtorisë së Emergjencave.
Pra, 30 premtime të mëdha të mandatit të dytë kanë mbetur të paralizuara, duke e shndërruar këtë mandat në një listë të gjatë premtimesh të parealizuara.
Gazeta Insajderi ka kërkuar përgjigje nga Komuna e Suharekës për arsyet e mosrealizimit të këtyre projekteve, por deri në publikimin e materialit nuk ka marrë asnjë përgjigje./Insajderi.org/
