Punëtorët e sektorit publik s’e kanë marrë asnjë shtesë në pagë, nga hyrja në fuqi e Ligjit për Pagat në sektorin publik. Në total janë dhjetë shtesa që ata mund t’i përfitojnë, por që Komisioni që është formuar për këtë çështje, ende s’e ka përfunduar punën. Nga Ministria e Punëve të Brendshme thonë se sapo të shqyrtohen e aprovohen kërkesat, punonjësit publikë do t’i marrin shtesat për të gjithë muajt në mënyrë retroaktive, por se kur do të ndodhë kjo saktësisht nuk kanë dhënë informata.
Më 5 shkurt të këtij viti, ka hyrë në fuqi Ligji për Pagat në sektorin publik, nga i cili janë prekur pagat e mbi 80 mijë punonjësve. Pagat e para me këtë ligj, ata i kanë marrë në fund të shkurtit, por jo edhe shtesat që u takojnë sipas po këtij ligji.
Për të përfituar nga këto shtesa, ata janë duke pritur tash e katër muaj, meqë Komisioni i themeluar për këtë çështje ka ende punë.
Zëdhënësja e MPB’së, Nora Fetoshi i ka thënë Gazetës Express se komisioni është duke i shqyrtuar kërkesat dhe se pas aprovimit të tyre, punonjësit do t’i marrin shtesat në mënyrë retroaktive për të gjithë muajt, që nga hyrja në fuqi e Ligjit për Paga në sektorin publik.
“Komisioni për përfitimin e shtesës për kushte specifike të punës, është duke i shqyrtuar kërkesat. Ju njoftojmë se ende nuk ka përfunduar puna e komisionit. Pas shqyrtimit dhe aprovimit të kërkesave, në mënyrë retroaktive do t’i marrin shtesat për të gjithë muajt që nga hyrja në fuqi e ligjit për paga në sektorin publik”, ka deklaruar Fetoshi.
Ajo ka treguar edhe se sa shtesa mund të përfitojnë punonjësit në sektorin publik.
“Shtesat të cilat mund ti përfitojnë punonjësit në sektorin publik në total janë 10 sosh dhe vlera e tyre për secilën kategori është specifikisht e rregulluar në mënyrë të veçantë me Ligjin për Paga në Sektorin Publik.”, thuhet në përgjigjet e Fetoshit.
Ligji për Paga në Kushtetuese
Ligji për Pagat në Sektorin Publik ka përfunduar në Gjykatën Kushtetuese, vetëm dy muaj pas hyrjes në fuqi.
Këtë ligj, Avokati i Popullit ia kishte dërguar Kushtetueses pas 104 ankesave të pranuara për të. Shumica e tyre kanë qenë për zvogëlimin e pagave, heqjen e shtesave apo trajtimin joadekuat dhe jo të barabartë ndërmjet pozitave të përcaktuara me ligj.
Deri tani, Kushtetuesja nuk ka nxjerrë ndonjë vendim për këtë ligj.
Paralajmërimet e para se Ligji do të përfundonte në këtë gjykatë ishin dhënë qysh në kohën kur Qeveria e mbante sekret vlerën monetare të koeficientit. Ato ishin shtuar më shumë ditën kur ishte vendosur vlera e koeficientit, e që është 105 euro për këtë vit dhe 110 për vitin e ardhshëm.
Ndryshe, Ligji i pagave ishte miratuar një herë në shkurt të vitit 2019. Por, një muaj para se të niste zbatimi i tij – në janar të 2020-s – institucioni i Avokatit të Popullit e pati dërguar atë në Gjykatën Kushtetuese për, siç kishte thënë, “vlerësimin e përputhshmërisë” së tij me Kushtetutën e Kosovës.
Më 30 qershor të vitit 2020, Gjykata Kushtetuese e Kosovës e kishte shpallë të pavlefshëm.
Sipas vendimit, ligji nuk ishte në përputhshmëri me 11 nene të Kushtetutës së Kosovës.
“Shkeljet kushtetuese të evidentuara në Ligjin e kontestuar janë të një peshe aq serioze, sa që të njëjtat ndikojnë në bërthamën e funksionimit të qeverisjes në Republikën e Kosovës – duke shkaktuar çrregullim të ndarjes së pushteteve në disfavor të Gjyqësorit dhe Institucioneve të Pavarura”, thuhej ndër të tjera në vendimin e Gjykatës.
