Betimi i kryetari i të Zveçanit, Ilir Peci do të bëhet në shkollën fillore “Isa Boletini”, në Boletin dhe kjo po ndodhë për shkaqe sigurie.
Kështu të pakëtën u shpreh Peci në një prononcim për GazetaBlic, ku theksoi faktin se seanca e parë është udhëhequr nga asamblisti më i vjetër, ku edhe u ndryshua lokacioni.
“Kur KQZ-ja i ka çertifikuar zgjedhjet, kryetari ka të drejtë të thirrë seancën e parë dhe aty automatikisht ajo duhet të drejtohej nga asambliste më i vjetër. Në në atë kohë i kemi dorëzuar ftesat, te asamblea edhe te ministri i Pushtetit Lokal për Zveçan, por asamblisti që është më i vjetri në moshë e që do të udhëheq seancën solemne e ka ndryshuar lokacionin dhe tani betimi do të bëhet në Boletin”, tha Peci.
Peci potencon se nuk do të ndodhë asnjë incident gjatë betimit.
“Nuk besoj se do të ndodhë ndonjë incident, shkaku i kësaj edhe është ndërruar lokacioni, pra për të qenë më të sigurtë”, tha Peci për GazetaBlic.
Edhe Izmir Zeqiri nga radhët e PDK-së, që pritet të betohet nesër si kryetar i Zubin Potokut, nuk mendon se mund të ndodhë diçka e paparashikueshme.
“Pasi është vendosur vendi dhe data dhe në zyret ku do të bëhet betimi, besoj se gjithçka do të shkojë në rregull. Edhe pse është raportuar se mund të ketë incidente, unë nuk besoj se mund të ndodhë një gjë e tillë”, thotë Zeqiri për GazetaBlic.
Ndryshe, të premten e javës së kaluar, Erden Atiq është betuar si kryetar i Mitrovicës së Veriut.
Ministri Krasniqi pas betimit të kryetari të ri në veri të Mitrovicës: E rëndësishme që qytetarët të kenë shërbime cilësore
Më 23 prill, në Mitrovicë të Veriut, Leposaviq, Zveçan dhe Zubin Potok u mbajtën zgjedhjet e jashtëzakonshme lokale.
Sipas KQZ-së, Lëvizja Vetëvendosje fitoi garën për kryetar komune në Mitrovicë të Veriut dhe Leposaviq, ndërsa Partia Demokratike e Kosovës fitoi në Zveçan dhe Zubin Potok.
Lista Serbe, partia më e madhe e serbëve në Kosovë nuk mori pjesë në zgjedhje dhe u bëri thirrje qytetarëve serbë që ta bojkotojnë procesin zgjedhor.
Komunat në veri mbetën pa kryetarë nga nëntori i vitit të kaluar, kur përfaqësuesit serbë në atë zonë dhanë dorëheqje nga vendet e tyre të punës, për shkak të mospajtimit me një vendim të Qeverisë së Kosovës për ri-regjistrimin e makinave me targa ilegale serbe.
