Gjermania ka rënë në recesion, tregojnë shifra të reja, pasi çmimet e larta shkaktuan një dëm më të madh në ekonominë e vendit nga sa ishte vlerësuar fillimisht.
Të dhënat e përditësuara të publikuara nga zyra federale e statistikave gjermane të enjten treguan se produkti i brendshëm bruto (PBB) ra me 0.3% në tremujorin e parë krahasuar me tre muajt e mëparshëm, i cili gjithashtu regjistroi një tkurrje.
Shifrat e rishikuara konfirmojnë se ekonomia gjermane u tkurr për dy tremujorë rresht. Ky është përkufizimi teknik i një recesioni (ose ndryshe krize ekonomike). Vlerësimet fillestare të publikuara në prill kishin sugjeruar se Gjermania kishte shmangur për pak një recesion, thjesht duke ngecur me një rritje prej 0%.
“U deshën disa rishikime statistikore, por në fund të fundit, ekonomia gjermane bëri këtë dimër atë që kishim frikë që nga vera e kaluar: ajo ra në një recesion teknik,” tha Carsten Brzeski ekspert ekonomik në bankaën holandeze ING.
Zyra e statistikave tha se ndërkohë që investimet e sektorit privat dhe ndërtimi u rritën në fillim të vitit, kjo u kompensua pjesërisht nga një rënie e shpenzimeve konsumatore pasi çmimet më të larta i detyruan familjet të shtrëngonin shpenzimet.
“Rritja e lartë e çmimeve vazhdoi të jetë një barrë për ekonominë gjermane në fillim të vitit,” tha zyra e statistikave.
Në përgjithësi, shpenzimet e familjeve ranë me 1.2% në tremujorin e parë. Blerësit ishin më pak të gatshëm të shpenzonin për ushqime, rroba dhe mobilje. Shpenzimet qeveritare gjithashtu u ulën me 4.9% krahasuar me tremujorin e mëparshëm.
Në përgjithësi, Brzeski tha se rënia e përgjithshme e Prodhimit të Brendshëm Bruto “nuk ishte skenari më i keq i një recesioni të rëndë.” Megjithatë, sipas Brezski, “moti i ngrohtë i dimrit, një rikthim në aktivitetin industrial, i ndihmuar nga rihapja e Kinës dhe një lehtësim i zinxhirit të furnizimit të sektorit të ushqimit, nuk mjaftuan për të nxjerrë ekonominë nga zona e rrezikut të recesionit,” shtoi ai.
Ekonomisti paralajmëroi se rënia e fuqisë blerëse, rënia e sektorit industrial, rritja e normave të interesit, si dhe një ngadalësim i rritjes ekonomike të huaj në vende si SHBA, ka të ngjarë të çojnë në një aktivitet më të dobët ekonomik për Gjermaninë në muajt në vijim.
“Përveç këtyre faktorëve ciklik, lufta e vazhdueshme në Ukrainë, ndryshimet demografike dhe tranzicioni aktual i energjisë do të rëndojnë strukturisht mbi ekonominë gjermane në vitet e ardhshme”, shtoi Brzeski.
