Ish-kongresisti amerikan, Tony Hall, të mërkurën ka takuar familjarët e ish-liderëve të UÇK-së, të cilët po gjykohen në Hagë për krime lufte, raporton Ekonomia Online.
Ky takim vjen pas vizitës që Hall u ka bërë ish-krerëve në Hagë, për të cilët tha se janë të dekurajuar nga padrejtësia dhe tej-zgjatja e gjykimit.
Pjesë e takimit me ish-kongresistin Hall ishin bashkëshortja e ish-presidenti Thaçi, Lumnija; bashkëshortja e ish-kryeparlamentarit Kadri Veseli, Violeta dhe djali Klestori; gruaja e ish-kryeparlamentarit Jakup Krasniqi – Sevdia me vajzën Gresën; gruaja e ish-shefit të GP të Vetëvendosjes, Rexhep Selimi – Shqipja etj.
Hall tha për Ekonomia Online se nuk ka arsye që ata të mbahen të burgosur, teksa ka treguar edhe për falënderimet dhe respektin që ka marrë nga kosovarët.
“Qëllimi i takimit ishte që t‘i vizitoja familjarët e atyre që po gjykohen në Hagë, për të qenë më ta, të flas me ta dhe në mënyrë që t‘ju jap shpresë”.
“I kam vizituar edhe në Hagë dhe ata janë burra të shquar, të mençur, mirëpo të dekurajuar për faktin se kanë 2 vjet që janë të burgosur dhe gjykimi siç duket do të zgjasë. Duket se nuk ka drejtësi për ta, nuk ka arsye që ata të jenë të burgosur”.
“I dua njerëzit e Kosovës, kanë qenë shumë falënderues dhe të mrekullueshëm. Kjo është hera e parë që jam në Kosovë, mirëpo dje i thashë gruas sime se ndoshta duhet të shpërngulemi këtu sepse njerëzit janë shumë të respektueshëm”, tha Hall.
Ndërsa, gruaja e Rexhep Selimit, Shqipe Mehmeti-Selimi, ka treguar për takimin, ku u diskutua për ish-krerët e UÇK-së dhe Gjykatën Speciale.
“Me ftesë të zotri Ahmet Shala i cili e ka ftuar kongresistin Hall për një konferencë, pati dëshirë që të na takojë neve pasi që ka shkuar për vizitë në Hagë. Ishte një takim i shkurtër, me bisedë rreth bashkëshortëve tanë dhe rreth Gjykatës Speciale”.
“Përshtypja e tij ishte se ata po mbahen të fortë dhe i vinte keq se ata gjenden atje”, tha ajo.
Në orët e pasdites, Hall do ta vizitojë edhe prindërit e ish-presidentit Hashim Thaçi, në Burojë të Skenderajt.
