Kryeministri i Kosovës, Albin Kurti, ka treguar një bisedë interesante telefonike që e ka zhvilluar me kryetarin e Leposaviqit, Lulzim Hetimi, i cili tash e dy javë po qëndron i mbyllur brenda objektit komunal.
Ai tha se të dy ishin të shqetësuar “se kush po lëshon pe”, sa i përket zhvillimeve në veri të Kosovës, dhe kërkesave të ndërkombëtarëve që kryetarët veriorë të punojnë në vende të tjera alternative.
Gjatë mbledhjes së Këshillit të Përgjithshëm të LVV-së, Kurti të dielën megjithatë deklaroi se nuk e ka ndërmend të lëshojë pe për situatën në veri.
“Unë e thirra në telefon dhe bisedova me kryetarin e Komunës së Leposaviqit, Lulzim Hetemin dhe ndodhi diçka interesante se – për të thënë të drejtën kur e thirra e kisha një çikë brengë se mos është mërzitur aty në zyrë, u bënë shumë javë, por unë teksa isha i brengosur mos është mërzitur ai, ai ishte i brengosur mos jam mërzitur unë. Kështu, që unë i shqetësuar mos po lëshon pe ai, e ai i shqetësuar mos po lëshoj pe unë, prandaj biseda në vazhdim ishte përveçse e përzemërt, edhe shumë e këndshme”, u shpreh Kurti.
Mes tjerash, Kurti u pajtua që të mbahen zgjedhjet e reja lokale në katër komunat veriore.
“Dhe zgjedhjet e hershme në 4 komunat në veri për të siguruar përfaqësim, por deri atëherë kryetarët e ligjshëm do të ushtrojnë funksionin e tyre pa pengim. Ne e kuptojmë që kryetarët e rinj kanë marrë pak vota, mirëpo këta kanë marrë pak vota, e ata tjerët s’kanë marrë aspak vota”, ka thënë shefi i qeverisë.
Sipas tij, “serbët duhet të dalin në zgjedhje dhe jo t’i bojkotojnë”. Zgjedhjet duhet të jenë fer dhe demokratike, e të mos ketë kërcënime, vijoi Kurti.
Sa i përket prezencës së Policisë së Kosovës në veri, Kurti tha ajo “do të mund të zvogëlohej në mënyrë proporcionale”.
Paraprakisht kjo mund të bëhet “në përputhje me situatën e sigurisë dhe largimin e këtyre bandave kriminale dhe arrestimin e tyre, sepse do të duhej që të përballen me drejtësinë”, sipas Kurtit.
“Dialogu për zbatimin e plotë të marrëveshjes bazike duhet të intensifikohet. Kemi nevojë për sekuencim të balancuar dhe fer të zbatimit të marrëveshjes bazike. Marrëveshjen jo vetëm që e kemi pranuar të dyja vendet, por ajo është edhe pjesë e konkluzioneve të Këshillit Evropian. Situata në veri nuk mund të tolerohej më. Jo për inat të ndokujt, por për hir të Republikës”, tha ndër të tjera ai.
