Në sallën e mbledhjeve të Kuvendit Komunal, kryetari i komunës, Bedri Hamza, në prani të drejtorëve komunal ka mbajtur takimin publik me qytetarë për të shpalosur punën e ekzekutivit për gjashtëmujorin e parë të vitit 2023.
Të pranishëm në këtë takim ishin përfaqësuesit e fshatrave dhe lagjeve të qytetit, përfaqësues të organizatave rinore, shoqërive civile si dhe qytetarë të tjerë.
Në fjalën e ti, kryetari Hamza fillimisht ka përshëndetur të pranishmit për pjesëmarrjen e tyre në këtë takim, për të vazhduar më pas edhe me prezantimin e projekteve të realizuara gjatë kësaj periudhe e që janë jetike për qytetarët e Komunës së Mitrovicës.
Nga kryetari Hamza, është thënë se që nga marrja e mandatit të tij, prioritete të qeverisjes kanë qenë arsimi, shëndetësia, sporti, kultura dhe infrastruktura rrugore.
“Më gëzon fakti që kemi rritur investimet në fushën e arsimit ku janë renovuar shumë shkolla, çerdhja publike si dhe rritja e numrit të bursave për studentët mitrovicas, ku edhe për këtë vit kemi planifikuar vazhdimin e realizimit të projekteve të mira në dobi të shkollave të qytetit të Mitrovicës”, theksoj Hamza.
Qytetarët gjatë këtij takimi, u njoftuan edhe për investimet pozitive të bëra në sektorin e shëndetësisë, përmes renovimit pothuajse të të gjitha QMF-ve e AMF-ve, kurse në muajin korrik të këtij vitit do të realizohet edhe projekti i dytë më i rëndësishëm në sektorin e shëndetësisë- vënia e gurthemelit të ambulantes në lagjen Iliridë.
Më tutje kryetari Hamza ka përmendur edhe dy premtimet e tij të dhëna për rregullimin e rrugës “Ali Zeneli’, dhe “Lah Nimani, të cilat ndodhën në qendër të qytetit të Mitrovicës.
“Prioritete të qeverisjes sime janë edhe dy rrugët kryesore në qytet për të cilat janë bërë edhe hapa konkret në fillimin e rregullimit të rrugës “Ali Zeneli”, dhe “Lah Nimani”, duke përfshirë këtu përgatitjen e planit teknik të detajuar, procedurat komplekse të shpronësimit, projekte këto që do të finalizohen në përfundim të vitit 2023”, shtoj Hamza.
Në këtë takim, kryetari Hamza njoftoi të pranishmit edhe për punët e bëra nga inspektorët komunal si dhe mbështetjen financiare për fermerët dhe sportistët mitrovicas.
Takimi i parë publik ka përfunduar pas pyetjet të parashtruara nga ana e qytetarëve të pranishëm dhe përgjigjeve të dhëna nga kryetari i komunës, Bedri Hamza, i cili ka theksuar se jemi në kohë, që të gjitha kërkesat racionale të inkorporohen në planifikimin e buxhetit për vitin e ardhshëm.
