Në Ditën e Çlirimit të Skenderajt, në mesin e shumë aktiviteteve, është përuruar edhe busti i heroit dhe veprimtarit të çështjes kombëtare, Idriz Rrecaj.
Kjo vepër artistike është punuar me finesë e zotësi të lartë artistike nga skulptori i njohur Sabri Behramaj, që me punën e tij tashmë ka kaluar kufijtë kombëtar, shkruan Gazeta Online Veriu info.
Kjo vepër artistike, që skaliti në bronz heroin Idriz Rrecaj, është vlerësuar lartë nga intelektuali e profesori i njohur nga Mitrovica, Fazli Hajrizi.
Shkrimtari e intelektuali Hajrizi ka shkruar se kjo vepër e skulptorit Sabri Behramaj dëshmon se ai është përjetues aktiv i historisë sonë, i tërësisë së ngjarjeve, është artist më botëkuptim të përparuar, pasion të ndezur e intelekt që sipas tij pak arrijnë ta kenë.
“Për realizimin e skulpturës kushtuar veprimtarit Idriz Rreci e ka ndihmuar talenti iu tij artistik, kultura e gjerë, serioziteti në punë, pasioni këmbëngulës për të ditur sa më shumë jo vetëm nga bota e artit, por edhe nga e shkencës. Gishtërinjtë e tij, siç thoshte me të drejtë Mikelanxhelo, e drejton intelekti i tij. Duke shikuar e studiuar këtë vepër, ashtu si shumë të tjera që i ka krijuar deri me tash, sidomos kryevepra kushtuar Hasan Prishtinës, arrijmë të kuptojmë se kemi të bëjmë me një artist shumë serioz, që ka evoluim të vazhdueshëm, që ka fuqinë komunikuese, mjeshtrinë përherë në përsosje, origjinalitet dhe frymë të dukshme kombëtare.” – shkruan intelektuali Hajrizi për veprën e skulptorit Behramaj.
Sipas intelektualit Hajrizi mesazhi i artistit Behramaj është: “Ji edhe ti shqiptar, njeri i lirë, plot krenari njerëzore dhe kombëtare që lufton për drejtësi, demokraci, prosperitet, bukuri e fisnikëri, se e ke traditën, mençurinë, talentin, virtytin…“
Në ngjarjen e përurimit të këtij busti kanë marrë pjesë personalitete të shumta politike, artistike e kombëtare.
Kryetari i komunës së Skenderajt, Fadil Nura, ka shkruar për këtë moment në urimin e tij për Ditën e Çlirimit të Skenderajt.
