Asociacioni i Gazetarëve të Kosovës ka reaguar e alarmuar pas vendimit nga MINT për të refuzuar ankesën e televizionit Klan Kosova, duke lënë në fuqi vendimin për pezullimin e certifikatës së biznesit të këtij mediumi.
AGK beson se ky proces ndaj Klan Kosovës ka qenë i motivuar politikisht dhe thotë se vendimi duhet të kuptohet si vendim i Lëvizjes Vetëvendosje dhe Kryeministrit të Kosovës, Albin Kurti për të mbyllur një medium për herë të parë që nga përfundimi i luftës në Kosovë.
“AGK-ja, beson se ky proces që nga fillimi ka qenë i motivuar politikisht nga partia në pushtet dhe Qeveria e Kryeministrit Kurti, në përpjekje për të mbyllur televizionin më të madh privat në vend. Vendimi i sotëm i ministrisë së udhëhequr nga ministrja Hajdari konfirmon luftën e hapur dhe të paprecedent të kësaj qeverie, kundër medieve, si paralajmërim që edhe të tjera medie do të jenë cak i sulmeve”, thuhet në reagim.
AGK-ja shtoi se “e inkurajon Klan Kosovën që ta vazhdojë betejën në gjykatë dhe shprehë besimin që gjykata nuk do të lejojë mbylljen e një mediumi në Kosovë.
Vendimi i sotëm politik i Qeverisë Kurti është goditja më e rëndë që i bëhet lirisë së medies në Kosovë që prej kohës së luftës”.
