Fillimi i sesionit vjeshtor të Kuvendit të Kosovës pritet të sjell ballafaqime të reja në mes të pozitës dhe partive opozitare. Këto të fundit kanë paralajmëruar hapa më ekstrem ndaj Qeverisë. Në këtë drejtim, opozita nuk i ka përjashtuar as protesta.
Deri me tani, opozita ka paralajmëruar themelimin e dy komisioneve hetimore për njerëzit e pushtetit. LDK-ja ka bërë me dije se do të kërkojë Komision Hetimor Parlament për hetimin e rezerva shtetërore. Kurse, PDK-ja ka kërkuar komision hetimor për hetimin e veprimtarisë së koordinatores së Komiteteve në VV-së, Dejona Mihali.
VV / Vjeshta fillon me hetime për pushtetin: Opozita paralajmëron komisione hetimore për dy zyrtare
Për t`u arritur këto qëllime po kërkohet unifikimi i partive opozitare, të cilat deri me tani nuk kanë vepruar në mënyrë të tillë.
Deputeti i AAK-së, Pal Lekaj, ka deklaruar për gazetën Nacionale se duhet unifikim më i qartë i opozitës kundër Qeverisë.
“Ka qenë një opozitë bashkëpunuese, por jo në nivel të kënaqshëm. Mendojë që duhet unfikim më i qartë përballë dështimeve dhe gabimeve të Qeverisë. Të keqes duhet t`i themi jo dhe ta ndalojmë atë nëse vërtetë është e dëmshme për qytetarët dhe institucionet”, ka thënë Lekaj.
Edhe deputetja e PDK-së, Ganimete Musliu, ka vlerësuar se nëse opozita nuk bashkohet për të ndalur këtë qeveri, Kosova do të shkojë drejt diktaturës.
Në një intervistë për gazetën Nacionale, ajo ka bërë me dije se në muajin shtator do të definohen shumë gjera.
“Shtatori do të jetë muaji i cili do të definojë shumë çështje të cilat janë aktualitet politik i muajve të fundit. I qëndroj mbrapa idesë sime që për Dejona Mihajlin duhet të iniciohet komision hetimor parlamentar, për të sqaruar fillimisht marrjen e shtetësisë së Kosovës duke marrë parasysh faktin që asaj i ishte ndaluar hyrja në Kosovë”, ka thënë Musliu.
Sipas saj, Kosova nuk ka nevojë për një opozitë të heshtur.
“Nëse opozita e neglizhon mundësinë parlamentare për të kërkuar llogari nga qeveria, jo vetëm për Dejona Mihajlin, por për të gjitha aferat, atëherë që sot e ka humbur garën politike dhe vendi jonë do të përfundojë në një diktaturë të paperjetuar deri më tani. Ne nuk kemi nevojë për një opozitë të heshtur. Ne kemi nevojë për një opozitë të sinqertë dhe aktive sepse dështimet e qeverisë aktuale kanë dal sheshit dhe heshtja opozitare nënkupton dorëzim”, ka thënë Kurti.
Opozita nuk i përjashton protestat
Përfaqësuesit e partive opozitare nuk e kanë përjashtuar as opsionin e protestave kundër Qeverisë.
Ata kanë bërë me dje se do të përdorin çdo opsion kundër kësaj qeveria.
Kryetari i PDK-së, Memli Krasniqi, ka paralajmëruar radikalizim të hapave të opozitës në raport me Qeverinë.
Në një intervistë për gazetën Nacionale, ai ka treguar se protesta është mjeti i fundit që do ta përdor partia më e madhe opozitare.
“Ka nevojë për të krijuar një lëvizje të gjithmbarshme popullore, e cila bëhet bashkë për të ndalur kursin e degradimit të mëtutjeshëm në të cilin është duke na dërguar ky kryeministër. Dhe PDK-ja do të luaj rolin kryesor në këtë drejtim. Andaj, nëse do të ketë përkeqëson, nëse do të ketë insistim për të shkuar tutje, nëse do të këtë shtuarje të sanksioneve ndaj Kosovës, padyshim që edhe veprimet tona do të jenë karshi dhe të barasvlershme në raport me gabimet apo veprime që do i ndërmarr kjo qeveri”, ka thënë Krasniqi.
Ai ka bërë me dije se para protestave do të përdorin edhe mjete tjera.
“Absolutisht nuk i përjashtoj protestat, por ato do të ishin një nga mjetet e fundit që do t`i zgjidhnim. Sepse mendoj se ka ende hapësirë që me mjete tjera demokratike të zgjidhim situatën. Që të dakorodohemi me një marrëveshje për zgjedhje të parakohshme”, është shprehur Krasniqi.
Edhe anëtarja e kryesisë së LDK-së, Jehona Lushaku-Sadriu, ka thënë se do të përdorini të gjitha mjetet demokratike ndaj qeverisë Kurti.
“Ne do të përdorim të gjitha format e shprehjes së protestës sonë ndaj qëndrimeve të dëmshme dhe veprimeve të Qeverisë: në Kuvend, në publik dhe në rrugë nëse është e nevojshme”, ka thënë ajo në një intervistë për gazetën Nacionale.
Kurse, deputeti i AAK-së, Pal Leka, ka thënë se opozita mjaft ka duruar.
“Protestat paqësore dhe me vend, janë element bazë i një shteti dhe funksionimit të demokracisë. Mendojë që mjaft kemi duruar, mjaftueshëm i kemi dhënë Qeverisë kohë që të punojë e zhvillojë vendin, por siç po duket kjo objektivë është larg apo vështirë e arritshme nga ky pushtet. Janë të dobët në udhëheqje, ku deri sot nuk dijmë asnjë sukses të madh, asnjë projekt e vendim që ka ndryshuar për të mirë funksionimin e shtetit dhe jetën e qytetarëve, të cilët po lëshojnë Kosovën si kurrë më parë pasi nuk po shohin asnjë perspektivë për të ardhmen me këtë Qeveri”, është shprehur Lekaj.
