Sot fillon viti i ri shkollor në Kosovë.
Sfida e këtij fillim viti për nxënësit është sigurimi i teksteve shkollore.
Ministria e Arsimit këtë vit ka propozuar një metodë të re të blerjes së librave nga prindërit nëpërmjet rimbursimit.
Por, mjetet e premtuara nga MASHT-i ende nuk janë ekzekutuar në llogaritë e prindërve.
Për këtë gjë ka reaguar ish-zëvendësministri i Arsimit, Azem Guri.
Ai tha tha për Front Online se ky vendim nuk po funksionon.
Guri thotë se sfida tjetër e propozimit të MASHT-it është mungesa e librarive në disa komuna.
“Nuk është duke funksionuar kjo është sfida e parë, tash fillon viti shkollor e prindërit ende nuk i kanë marr mjetet dhe furnizimi shkollor është shumë i vështirësuar sidomos në komunat që s’ka librari”, theksoi Guri.
Ish-zëvendësministri ka thënë se vendimi i sivjetshëm i ministrisë është në kundërshtim me ligjin.
“Ky vendim nuk është i duhuri dhe është në kundërshtim me ligjin se ligji e obligon ministria me i ofruar tekstet falas. Teknikisht ky vendim është shumë i vështirë me u arrit dhe do të shkojë një kohë e gjatë deri t’i sigurojë prindërit tekstet për fëmijët”, u shpreh Guri për Front Online.
Ministria e Arsimit e kishte anuluar më 9 gusht tenderin për blerjen e teksteve shkollore për nxënësit e klasës së parë deri në klasën e pestë, për vitin e ri shkollor që nis më 1 shtator, nën arsyetimin se “librat janë shtrenjtë”.
