Avokatja u arrestuar për veprën penale “Keqpëdorim i besimit”, është Emine Bajrami-Statovci.
Këtë e ka konfirmuar për “Betimi për Drejtësi“, kryeprokurori i Ferizajt, Shukri Jashari, i cili tha se masa e paraburgimit ende nuk është kërkuar.
“Jo paraburgim s’është kërku, po është arrestu dje në ora dhjetë domethënë është ndalu për veprën penale “keqpërdorim i besimit, është Emine Bajrami Statovci”, tha ai.
Sipas Policisë, Bajrami-Statovci dyshohet se në cilësinë e përfaqësueses ligjore, keqpërdori rreth 16 mijë euro në një lëndë të një aksidenti të ndodhur më 2012.
Arrestohet se në cilësinë e përfaqësuesit ligjor dyshohet se keqpërdori rreth 16 mijë euro lidhur me një lëndë të aksidentit të 2012-ës
Në njoftimin e Policisë, thuhet se më 22 gusht 2023, rreth orës 10:00, Sektori Rajonal i Hetimeve në Ferizaj kishte pranuar një informacion nga një person se nuk ishte kompensuar nga një kompani e sigurimeve, për çështjen juridike të kompensimit të dëmit jomaterial, për aksidentin që i kishte ndodhur në vitin 2012, raporton “Betimi për Drejtësi“.
“Lidhur me këtë, hetuesit rajonal nën autorizim të prokurorit nga Prokuria Themelore në Ferizaj i kishin nisur hetimet dhe nga provat e grumbulluara, lënda në të cilën ishte dëmtuar ankuesi, një pjesë ishte gjykuar dhe kishte formën e plotfuqishmërisë, kurse pjesa tjetër ishte kthyer në rigjykim”, thuhet në njoftim.
Sipas Policisë, më 1 tetor 2020 kompania e sigurimeve kishte bërë transferin e parave rreth 16 mijë euro në llogari të përfaqësuesit ligjor.
Mirëpo, thuhet se ekziston dyshimi se përfaqësuesi ligjor i palës së dëmtuar, për arsye ende të panjohura nuk i ka përmbushur detyrimet ligjore, ose i kishte keqpërdorur autorizimet me qëllim që vetes, apo personit tjetër t’i sjellë dobi pasurore të kundërligjshme, apo t’i shkaktojë dëm personit që ka përfaqësuar.
“Me datën 04.09.2023, përfaqësuesi ligjor është shoqëruar në Sektorin Rajonal të Hetimeve dhe pas intervistimit nga policët hetues, është informuar Prokuroria Themelore në Ferizaj dhe me Aktvendim mbi ndalimin e personit të arrestuar, të lëshuar nga gjykatësi i Procedurës Paraprake nga Gjykata Themelore në Ferizaj është ndaluar për 48 orë, për procedura tjera hetimore, ndërsa rasti është cilësuar ‘’ Keqpërdorim i besimit’’”, thuhet në njoftim.
