Presidentja e Kosovës, Vjosa Osmani, derisa ka folur për politikën e jashtme dhe raportet me ndërkombëtarët, ajo ka thënë se nëse atyre nuk iu pëlqejnë vendimet apo veprimet e institucioneve të Kosovës, nuk duhet ta ndëshkojnë popullin e Kosovës.
Osmani ka thënë kështu duke iu referuar liberalizimit të vizave si padrejtësi ndaj qytetarëve të Kosovës, për shqyrtimin e të cilit ka folur së fundmi presidenti francez Macron.
Lidhur me këtë, zëdhënësi i PDK-së, Faton Abdullahu, në një prononcim për Gazeta Blic, thotë se është e vërtetë që Kosova ka popullin më pro evropian, por që tash e sa kohë këtë nuk po përfaqësojnë Qeveria dhe Presidenca dhe i kanë deformuar raportet me SHBA-të e BE-në.
“Populli i Kosovës është më pro-evropiani, konstaton Presidentja Osmani – kjo është e vërtetë, po aq sa është e vërtetë edhe tjetra, të cilën ajo nuk e thotë se, tash sa kohë institucionet e Kosovës, sidomos Qeveria dhe Presidenca, nuk po e përfaqësojnë këtë mendësi. Përkundrazi, në raport me ShBA-n dhe BE-në e kanë deformuar këtë marrëdhënie si kurrë më parë”, thotë ai.
Sipas Abdullahut, sipas deklarimit të Osmanit për Macronin, i bie që Kurti dhe Osmani po e mbrojnë popullin e Kosovës nga gjërat e këqija që BE e SHBA po thurin kundër tij.
““Për më keq, nëse dëgjohet me vëmendje ajo çfarë thotë Presidentja, për deklarimin e Presidentit francez, i bie se për qytetarët e Kosovës BE-ja dhe SHBA-ja ka kohë që po përgatisin gjëra të këqija për Kosovën, po falë Zotit këtu janë Kurti dhe ajo vet e po na mbrojnë nga këto të këqija që po u gatuakan kundër nesh”, vlerëson ai për Gazeta Blic.
Zëdhënësi i PDK-së shton se kjo mendësi politike është degradim i rrezikshëm për ekzistencën normale të vendit dhe se Osmani para se ta mësojë Macronin se si mund të ndëshkohet një shtet e popull, duhet të bëjë politika që qytetarët të mos mbesin pa viza e të mos kenë masa ndëshkuese.
“Kjo mendësi politike, tash sa kohë e institucionalizuar në Kosovë, është degradim i rrezikshëm për jetën demokratike dhe për vetë ekzistencën normale të vendit tonë. Para se Presidentja t’i mbajë leksione Macronit se si ndëshkohet një shtet e si mund të ndëshkohet një popull, është mirë ajo të bëjë politika koordinuese, sidomos me SHBA-të, që qytetarët të mos mbesin pa viza dhe Kosova të mos futet nën masa të reja ndëshkuese”, deklaron Faton Abdullahu./Gazeta Blic/
