Vetëm dje, Gjykata Speciale ka kryer një bastisje dhe një arrestim. Në banesën e familjes së heronjve Fahri e Bahri Fazliu, hetuesit e Speciales konfiskuan një telefon, një laptop, disa fotografi familjare e shoqërore, si dhe disa dokumente. Telefoni iu konfiskua edhe ish-eprorit të UÇK-së, Rrustem Mustafa. Këto dy zhvillime po shihen si intensifikim i Prokurorisë në Hagë për hetime. Ndërkohë, Specialja nuk i komenton zhvillimet.
Dje me urdhër të Prokurorit të Specializuar në Hagë, u bastis banesa e familjes së heronjve Bahri e Fahri Fazliu, si dhe u arrestua e më pas u lirua ish-komandanti i UÇK-së, për Zonën Operative të Llapit, Rrustem Mustafa-Remi. Të dy këto ngjarje u panë si sinjal për intensifikimin e punës së Gjykatës Speciale. Nga kjo e fundit nuk i kanë komentuar zhvillimet.
“SPO nuk komenton për hetimin e saj apo për çështje operative”, ka thënë për Express, zëdhënësi i Zyrës së Prokurorit të Specializuar, Christopher Bennet.
E për avokatin e akredituar nga Gjykata Speciale, Artan Qerkini zhvillimet e djeshme dëshmojnë një shtim të punës nga Specialja në aspektin e hetimit.
“Apo vërehet se është një aktivitet i shtuar i Prokurorisë në zhvillimin e hetimeve, po po vërehet. Ne si avokatë i përcjellim me vëmendje këto zhvillime dhe sa herë që vërejmë shkelje në ndërmarrjen e veprimeve procedurale ne reagojmë përmes mjeteve juridike duke i kontestuar ato veprime gjithnjë duke u munduar që sa më mirë të i përfaqësojmë interesat e klientëve të cilat ne i mbrojmë në procedurat që janë në rrjedhojë e sipër pranë Dhomave të Specializuara”, ka thënë ai.
Për sa i përket konfiskimit të telefonave të ish-komandant Remit dhe Fadil Fazliut, ai tha se nuk kanë informacione se mbi çfarë baze janë konfiskuar ata.
Megjithatë, sipas Qerkinit, parimisht për t’u konfiskuar një telefon janë disa kushte që duhet të plotësohen. Këtu ai përmendi dyshimin e bazuar se në atë telefon mund të gjenden prova se ekziston dyshimi se është kryer një vepër penale.
“Për me e konfiskua një telefon duhet me u plotësu disa kushte. duhet të ekzistojë një dyshim i bazuar që është kryer një vepër penale dhe duhet me egzistu një dyshim i bazuar që në atë telefon mund të gjenden prova. Mirëpo tani në këtë fazë ne ende nuk e dimë se në çka është mbështet gjykimi i bazuar se personi që i konfiskohet telefoni ka kryer vepër penale dhe se në çfarë është mbështetur dyshimi i bazuar se në telefon mund të gjenden prova”, tha ai.
Qerkini paralajmëroi se kur të jepet qasje e plotë në dokumentacion do të kontestojnë veprimet në rast se nuk është plotësuar baza ligjore.
“Me këto informata në këtë fazë të procedurës nuk i kemi. Në momentin kur krijohet një fazë e re e procedurës dhe kur na jepet qasje në tërë dokumentacionin, ne mund t’i kontestojmë këto veprime mbi kushtin e mosplotësimit të bazës ligjore për urdhërimin e tyre”, deklaroi tutje avokati Qerkini.
Ndërkaq bastisjen në banesën e familjarëve të heronjve Bahri e Fahri Fazliu dhe arrestimin e komandant Remit, analisti Artan Behrami i ka cilësuar si tentim të Prokurorisë e Gjykatës Speciale për frikësim të dëshmitarëve.
“Prokuroria e Gjykatës Speciale tani po operon me mendësinë e Millosheviçit. Kur filloi të humbë të gjitha betejat në sallën e gjykatës, ka filluar bastisje dhe arrestime politike. Operacionet e djeshme kanë për qëllim frikësimin e dëshmitarëve. Por, Prokuroria e Gjykatës Speciale nuk kanë dhoma të mjaftueshme të burgut për të zënë të gjithë shqiptarët që janë të gatshëm të sakrifikojnë për të treguar të vërteten për luftën çlirimtare të popullit të Kosovës!”, ka thënë ai.
E Këshilli për Mbrojtjen e të Drejtave dhe Lirive të Njeriut, ka kërkuar nga deputetët e Kuvendit të Kosovës që ta rishqyrtojnë Ligjin e amandamentuar për Gjykatën Speciale.
“Gjykatë qenka e Kosovës sepse është votuar nga deputetët e Kuvendit të Kosovës. Në këtë kontekst, KMDLNJ-ë kërkon nga deputetët e Kuvendit të Kosovës ta rishqyrtojnë Ligjin e anandamentuar për Gjykatën Speciale në mënyrë që të rikthehet sovraniteti i Kosovës në fushën e sigurisë dhe të drejtësisë e që i është dhënë kësaj Gjykate nga persona të papërgjegjshëm apo i është marrë nën kërcënim apo shantazh. Institucionet e Kosovës duhet përfundimisht të deklarohen nëse kjo Gjykatë është e Kosovës, Serbisë apo e Tanzanisë në të kundërtën do të kenë përgjegjësi për të gjitha veprimet e kësaj Gjykate”, thuhet në reagimin e KMDLNj-së.
Bastisja tek familja e Fahri dhe Bahri Fazliut
Pjesëtarë të Dhomave të Specializuara dhe të Zyrës së Prokurorit të Specializuar të Kosovës, kanë realizuar dje një bastisje në banesën e familjes së heronjve Fahri e Bahri Fazliu.
Bastisja ka nisur në orët e mëngjesit ndërsa, avokati i familjes Fazliu, Artan Qerkini tha se nuk është sekuestruar asgjë, ndërsa e ka cilësuar si të kotë bastisje.
“Dhomat e Specializuara kanë realizuar një bastisje në shtëpinë e heronjve kombëtar Fahri e Bahri Fazliu dhe me këtë rast janë munduar, kinse të sekuestrojnë prova të cilat atyre ju nevojiten mirëpo ata nuk kanë sekuestruar asnjë provë të vetme dhe se ka qenë një bastisje e kotë dhe humbje kohe”, ka deklaruar avokati.
E familjari i heronjve, Fadil Fazliu tha dje se atij i janë konfiskuar një telefon, disa fotografi familjare dhe shoqërore dhe laptopi i punës.
Teksa tha se kjo banesë në kohën e luftës ka shërbyer si bazë e UÇK-së.
“Kjo banesë ka shërbyer si bazë e UÇK-së deri në përfundim të luftës, por edhe sot është banesë e shoqërisë e shokëve tanë. Nuk ka kryeministër që nuk ka qenë këtu”, tha Fazliu.
Arrestimi dhe lirimi i komandant Remit
Mbrëmë poashtu u arrestua e më pas u lirua ish-komandanti i UÇK-së, Rrustem Mustafa i njohur si komandant Remi.
Pas lirimit Mustafa tha se ka pasur urdhër nga Prokuroria e Gjykata Speciale për kontrollimin e telefonit të tij.
“Sonte rreth orës 20:00 para shtëpisë time më janë prezantuar hetuesit e Gjykatës Speciale të Kosovës me një urdhër nga prokuroria e Gjykatës Speciale për kontroll të telefonit. Gojarisht më shpjeguan se duhet të bëjmë një bisedë zyrtare në zyre të Eulexit. Personeli nga Gjykata Speciale janë sjellur me respekt. Në zyre të Eulexit më është sekuestruar telefoni im dhe posa është bërë kjo kontrollë pa asnjë interesim shtesë nga ana e tyre, ka përfunduar biseda dhe tani gjendem në shtëpi”, shkroi ai pas lirimit në rrjetin social “Facebook”.
Kujtojmë që Remi kohëve të fundit ka dëshmuar në rastin e Hashim Thaçit, Kadri Veselit, Jakup Krasniqit dhe Rexhep Selimit në Hagë.
Rastet ne gjykim nga Gjykata Speciale
Aktualisht në fazën e gjykimit dhe marrjes në pyetje të dëshmitarëve është rasti i krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi. Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Poashtu në fazën e Gjykimit është edhe rasti i Pjetër Shalës.
Ndërkaq dy raste kanë përfunduar gjykimin.
Nasim Haradinaj dhe Hysni Gucati janë dënuar me katër vjet e gjysmë burgim për frikësim të dëshmitarëve, hakmarrjes ndaj dëshmitarëve ose pengimit të drejtësisë.
Dënim ka marr edhe ish-eprori i UÇK-së, Salih Mustafa i njohur si komandant Cali.
Ish-komandanti i Ushtrisë Çlirimtare të Kosovës, Salih Mustafa, është dënuar nga Gjykata Speciale, me seli në Hagë, me 26 vjet burgim për vrasje të paligjshme, ndalim arbitrar dhe torturë.
Ai është dënuar me 10 vjet burgim për ndalim arbitrar, 22 vjet burgim për torturë dhe 25 vjet burgim për vrasje të paligjshme, teksa është shpallur i pafajshëm për trajtim mizor.
