Një zyrtar i Komunës së Deçanit është arrestuar këtë të mërkurë, pasi dyshohet për veprën penale “marrja e ryshfetit”.
Sipas njoftimit të policisë, nga hetuesit policorë në bashkëpunim me prokurorinë është arritur të sigurohen dëshmi se i njëjti është përfshirë në veprimtari kriminale.
“I dyshuari, H.I., (viti i lindjes 1964, mashkull kosovar), nëpunës në Qendrën Komunale të Regjistrit Civil – Deçan, gjatë vitit 2022 dhe fillim të vitit 2023, në tri raste përmes institucioneve bankare ka pranuar të holla (rreth 1800 euro). I dyshuari, të hollat i ka pranuar nga viktima e rastit J.J., nga Deçani i cili jeton në Zvicër, me qëllim që të njëjtin ta regjistrojë në sistemin e gjendjes civile në Deçan”, thuhet në komunikatën për media.
Po ashtu, në fund të muajit gusht 2023 në Facebook, është publikuar edhe një pretendim se i dyshuari në mënyrë të njëjtë ka vepruar edhe me qytetarin H.E., i cili jeton në Gjermani.
“Mbi bazën e këtyre dëshmive e pretendimeve, është krijuar dyshimi se H.I., dyshohet të ketë kryer veprën penale ‘marrja e ryshfetit’. Hetuesit policorë janë duke vazhduar me trajtimin e rastit përfshirë identifikimin dhe intervistimin e viktimës së dytë (H.E., nga Gjermania).
Sot, i dyshuari është arrestuar, është intervistuar në prezencë të avokatit mbrojtës dhe me aktvendim nga prokurori është dërguar në mbajtje deri në 48 orë”, bëhet e ditur tutje.
