Shumë tregtarë mbetën pa vendin e tyre të punës ku bënin aktivitetin e tyre tregtar tash e shumë vite në Mitrovicë, pasi kjo komunë vendosi t’i largojë nga kjo hapësirë në rrugën Adem Voca, afër tregut të qytetit.
Kjo tokë po i kthehet në shfrytëzim pronarit paraprak që është Bashkësia Islame e Kosovës, e të cilën deri tash komuna e Mitrovicës e ka pasur në shfrytëzim me qera nga BIK, vend ku i kishte akomoduar shumë vite më parë disa tregtar që paraprakisht ishin të vendosur te ish tregu në qendër të qytetit, raporton Veriu.info.
Gjithë kjo situatë u krijua pas kërkesës së Bashkësisë Islame e cila duket se ka vendosur që këtë tokë ta shfrytëzojë për një qëllim të caktuar.
Gazeta Online Veriu.info mëson nga burimet e saj se Bashkësia Islame e Kosovës, dega në Mitrovicë, po planifikon që këtë tokë në qendër të Mitrovicës ta japë për ndërtimin e objekteve afaristo banesore.
Sipas këtij burimi aty do të ndërtojë objekte një kompani ndërtimore, ku katet e para do të jenë biznese kurse tjerat banesa për shitje.
Veriu.info po ashtu mëson se ky vendim nuk po përkrahet nga të gjithë anëtarët e kryesisë së BIK-ut, pasi disa po e konsiderojnë vendim jo të duhur që në tokën e BIK-ut të ndërtohen objekte afariste dhe banesore.
Gazeta Online Veriu.info ka dërguar pyetje në adresë të kryetarit të BIK-ut dega në Mitrovicë, Enis Rama, rreth procesit të kthimit të pronës dhe planifikimeve se çfarë do të bëhet me të.
Rama ka thënë se procesi i kthimit të pronës tek BIK nuk ka përfunduar ende por se janë shumë afër.
“Ende nuk e kemi të kthyer terësisht pasiqë sipas kontratës prona duhet të kthehet komplet në gjendjen fillestare. D t th afër jemi shumë mirëpo ende jemi në proces deri në përfundim.” – ka deklaruar Rama.
Ndërtimin e objekteve banesore në këtë pronë e ka mohuar kryetari i BIK-ut, Enis Rama, i cili ka deklaruar se është e pasaktë.
“Informacionet që keni janë plotësisht të pasakta dhe si duket vijnë nga burime me qasje tendencioze dhe skajshmërisht paragjykuese.” – deklaron kryetari i BIK-ut në Mitrovicë.
Nesër BIK do të mbajë mbledhje të rregullt, ku kryetari Rama ka mohuar se prona te tregu do të jetë pjesë diskutimi.
Mbetet t’ia lëmë kohës për të parë se çfarë do të ndodh me pronën e vlefshme të BIK-ut në Mitrovicë.
