Ricardo Gutierrez, Sekretari i Përgjithshëm i Federatës Evropiane të Gazetarëve ka thënë se është i shqetësuar lidhur me mbarëvajtjen e procesit për përzgjedhjen e një anëtari në bordin e drejtorëve të Radio Televizionit të Kosovës.
Ai tha se duket qartë se ka manipulime politike, e veçanërisht nga LDK-ja.
“#Kosova : Kam shqetësime të forta për vlefshmërinë e procesit aktual të rinovimit të bordit të drejtorëve të transmetuesit publik RTK. Mua më duket e qartë se ka pasur manipulime politike, veçanërisht nga opozita e LDK-së, për diskreditimin e padrejtë të kandidatëve të caktuar. LDK do të bënte më mirë të mbronte interesin publik sesa interesat e saj partiake”, tha ai.
Gutierrez deklaroi se ka dyshime edhe për kandidatin më të favorizuar nga shumica e partive politike, Mehmet Kalisi.
Kjo pasi sipas tij, ky person publikisht e mbështet partinë në pushtet dhe kryeministrin.
“Kam disa dyshime edhe për kandidatin më të favorizuar nga shumica e partive politike, Mehmet Kalisi, i cili është një person që publikisht mbështet partinë në pushtet dhe kryeministrin e Kosovës. Propozimi i tij për të krijuar një agjenci shtetërore të lajmeve brenda transmetuesit publik është një projekt i rrezikshëm. Televizioni publik është i të gjithë qytetarëve, jo i shtetit. Mendoj se një kandidat që ka plane të tilla nuk duhet të bëhet anëtar i bordit të RTK-së”, tha tutje ai.
Ai ka kërkuar nga kryeministri Albin Kurtyi që të anulojë procesin aktual dhe të sigurojë që personat si Kalis ose të tjerë që janë të lidhur me VV-në të qëndrojnë larg bordit të RTK-së.
“I bëj thirrje Lëvizjes Vetëvendosje dhe kryeministrit Albin Kurti që të anulojnë procesin aktual të zgjedhjes së anëtarëve të bordit dhe të sigurojnë që individët si z. Kalisi apo të tjerë që janë të lidhur me partinë në pushtet të mbahen larg bordit të RTK-së. I kujtoj zotit Kurti se puna e mirë e bërë nga partia e tij në zgjedhjen e bordit të transmetuesit publik dy vjet më parë u komprometua seriozisht kur drejtor i televizionit publik u zgjodh Rilind Gervalla, një person i afërt me Lëvizjen Vetëvendosje. Autoritetet publike në Kosovë duhet të shmangin politizimin e mëtejshëm të RTK-së. Në interesin më të mirë të qytetarëve të Kosovës”, tha ndër të tjera ai në një postim në “Facebook”.
Komisioni Ad hoc i kishte propozuar Kuvendit për votim për anëtar të Bordit të RTK-së Mehmet Kalisin dhe Besnik Aliun. Vëzhguesit e procesit dhe organizatat ndërkombëtare alarmojnë për mungesë transparence dhe objektiviteti gjatë përzgjedhjes. Kërkohet që ky proces të përsëritet. Më i vlerësuari, Mehmet Kalisi, kishte postime ku i shante të gjitha mediat kosovare dhe thoshte se kur i lexon mediat serbe “ndihesh shumë më i çliruar”.
