Në Mitrovicën Veriore, Zubin Potok dhe në Leposaviq është konfirmuar se serbët lokalë kanë shprehur interesim për të nisur mbledhjen e nënshkrimeve për peticionin përmes së cilit duan shkarkimin e kryetarëve. Edhe nga Komisioni Qendror të Zgjedhjeve, kanë mbërritur katër e-maile, tri prej të cilave përmbajnë formulare për inicimin e kërkesës për largimin e kryetarit të komunës nga funksioni.
Pasi edhe protestat e dhunshme nuk dhanë rezultat, serbët e katër komunave veriore, tani janë kthyer formës së ligjshme në interesimin për t’i larguar kryetarët shqiptarë të komunave nga pozitat e tyre.
Këtë e kanë bërë duke iu referuar udhëzimit administrativ për iniciativën e qytetarëve për largimin e kryetarit të komunës nga funksioni, i miratuar së voni nga Ministria e Administrimit të Pushtetit Lokal.
Megjithatë aty parashihen të gjitha procedura e të cilat sipas Kryesuesit të Kuvendit nuk janë respektuar.
“Kanë gabuar më së pari që nuk e kanë njoftuar Kryesuesin e Kuvendit tri ditë para për iniciativën për inistiativën për peticionin. Edhe pastaj me kërkesë me u lajmëru që do të nisë peticioni.”, ka thënë Nexhat Uglanjin, kryesues i Kuvendit Komunal
Shembullin e 10 të interesuarve në këtë komunë e kanë ndjekur edhe serbët në Zubin Potok. Këtë e ka konfirmuar kryetari aktual.
“Kanë bërë një iniciativë ata me e taku dikë prej kabinetit mirëpo kjo nuk ka të bëjë me kabinetin e kryetarit duhet me shku te Kryesuesi i Kuvendit, dhe përmes Kuvendit ata me kshyr qysh shkojnë këto procedura”, ka thënë Izmir Zeqiri, kryetari i Zubin Potokut.
Edhe Zeqiri edhe Ugljanin këto iniciativa i vlerësojnë politike dhe me shumë të panjohura.
Nuk dihet nëse edhe kryetari i Leposaviqit e ndanë mendimin e njëjta, por edhe serbët në komunën të cilën ai e udhëheqë gjatë distës janë interesuar për shkarkimin e tij.
“Po, po, ka pasur, aktivitet për peticion, por diçka informata shtesë nuk është që kemi marrë.”, ka thënë asistentja e kryetarit të Leposaviqit, Festina Musliu.
Vetëm nga komuna e Zveçanit nuk kanë treguar nëse edhe aty ka pasur iniciativë të tillë.
Se ka interesim që të nisë procesi i shkarkimit të kryetarit e kanë pranuar edhe nga Komisioni Qendror i Zgjedhjeve, të cilët thonë se do t’i trajtojnë kërkesat.
“Mund t’iu konfirmoj se gjatë ditës së sotme, në disa e-maila zyrtar, kemi pranuar katër e-maile, tri prej të cilave kanë të bashkëngjitur të plotësuar formularin për inicimin e kërkesës për largimin e kryetarit të komunës nga funksioni. Në këtë fazë, mund t’iu them se këto shkresa do të trajtohen dhe do t’iu informojmë për këtë.”, ka thënë Valmir Elezi nga KQZ.
Sipas udhëzimit administrativ, grupi nismëtar prej tre personave para se të fillojë mbledhjen e nënshkrimeve duhet të njoftojë kryesuesin e Kuvendit Komunal dhe mund të njoftojë KQZ-në.
Pastaj Kryesuesi njofton kryetarin e komunës, MAPL-në dhe KQZ-në.
Jo më vonë se pesë ditë nga pranimi i njoftimit, Kryesuesi shqyrton kërkesën, në rast të dëshmtimit grupi nismëtar kërkon nga KQZ të shqyrtojë kërkesën dhe e regjistron si palë të autorizuar.
Në rast se kjo iniciativë mbështet nga 20% e votuesve, atëherë i hapet rrugë votimit direkt për shkarkim i cili kërkon 50% plus 1 votë të qytetarëve që kanë të drejtë vote.
