Kreu i Drenasit, Ramiz Lladrovci në një prononcim për GazetaBlic ka folur rreth deklaratës së fundit të kryekuvendarit, Glauk Konjufca i cili tha: “S’ka Asociacion, pa njohje nga Serbia”.
Lladrovci tha se kjo duhej të cekej me shkronja e me fjalë edhe në Marrëveshjen e Ohrin dhe në draftin e publikuar rreth Asociacionit.
Tash këtë deklaratë, kreu i Drenasit e sheh të vonshme.
“Këtë deklaratë e vlerësoj si kofinin pas të vjelave. Nëse do të ishte pikë nga e cila nuk do të lëvizte pozita aktuale qeverisëse, do të duhej të cekej me shkronja e me fjalë edhe në Marrëveshjen e Ohrit edhe në draftin e publikuar rreth Asociacionit”, thotë ai.
Lladrovci nuk e ka përjashtuar mundësin e zgjedhjeve të parakohshme.
“Kam frikë se është tepër vonë për këtë qëndrim. Mendoj se do ta lëshojmë edhe një herë bajrakun dhe zgjidhja për asociacion pa kokërr njohje do të bëhet shkas dhe kauzë e fushatës së zgjedhjeve të parakohshme, për të shpëtuar çka mund të shpëtohet”, tha Lladrovci.
