Në sallën e mbledhjeve të Kuvendit Komunal, kryetari i komunës, Bedri Hamza, në prani të nënkryetarit, Arian Tahiri dhe të drejtorëve komunal ka mbajtur takimin e dytë publik me qytetarë për të shpalosur punën e ekzekutivit për vitin 2023.
Në fillim të këtij takimi, kryetari Hamza ka përshëndetur të gjithë të pranishmit duke theksuar se me punë të palodhur është arritur të realizohen me sukses një sërë projektesh që janë jetike për qytetarët e Komunës së Mitrovicës.
Gjatë këtij takimi nga kryetari Hamza, janë shpalosur projektet infrastrukturore të realizuara në fshatrat dhe lagjet e komunës së Mitrovicës, si dhe projektet infrastrukturore të cilat janë në realizim e sipër.
Qytetarët gjatë këtij takimi u informuan poashtu edhe me investimet e bëra në fushën e arsimit, përmes renovimit të shumë shkollave, pajisjen e tyre me kabinete adekuate, renovimi dhe pajisja me inventar në çerdhen “Gëzimi Ynë”, ndërtimi i çerdhes në Iliridë e Shipol të cilat janë në proces si dhe planet për zgjerimin e çerdheve edhe në disa lokalitete të qytetit.
Kryetari Hamza ka shtuar se qe nga ardhja e tij në krye të komunës është rritur edhe numri i bursistëve, ku nga 50 bursa sa ishin në fillim të mandatit kemi rritur numrin e bursave në 250.
Po ashtu, në këtë takim qytetarët u njoftuan edhe për mbështetjen financiare për fermerët mitrovicas, sportistet, dhe investimet e bëra në sektorin e shëndetësisë, përmes renovimit pothuajse të të gjitha QMF-ve dhe AMF-ve, dhe punët dinamike e më intensitet të lartë që po bëhen në ndërtimin e Qendrës Kryesore të Mjekësisë Familjare “Dr. Nexhat Çuni” dhe Qendrës së Mjekësisë Familjare në Iliridë, të cilat janë investimet më madhore në shëndetësinë primare të Mitrovicës.
Në fund të takimit, të gjitha pyetjeve të parashtruara nga ana e qytetarëve të pranishëm, e që kryesisht kishin të bënin me infrastrukturë, shërbime publike, arsim, kulturë, shëndetësi dhe urbanizëm u është përgjigjur kryetari i komunës, Bedri Hamza.
