Mitrovicë – Në Gjykatën Themelore të Mitrovicës, të martën është dhënë fjala hyrëse në shqyrtimin gjyqësor ndaj të pandehurit Haxhimet Ferati, i cili po akuzohet se në cilësinë e menaxherit të Zyrës së Prokurimit Publik në Komunën e Mitrovicës ka keqpërdorur pozitës apo autoritetit zyrtar.
Në fjalën hyrëse, prokurori i shtetit Sahit Tmava tha se kryerja e veprës penale nga i pandehuri do të provohet gjatë shqyrtimit gjyqësor, nga provat mbi të cilat është ngritur kjo aktakuzë, prova të cilat gjenden në propozim të aktakuzës, si dhe nga dëshmia e dëshmitares Florije Salihi.
Ndërsa mbrojtësi i të akuzuarit Ferati, avokati Armend Shkoza tha se prokuroria në aktakuzën e saj nuk ka saktësuar fare se cila është shkelja konkrete e dsipozitës ligjore që inkriminon të mbrojturin e tij, dhe se pretendimin e tillë e mbështet kryesisht në interpretimin e dhënë nga zyrtarja ligjore, në Departamentin e rregullave pranë Komisionit Rregullativ të Prokurorimit Publik .
“E vetmja ndalesë e cila konsiderohet e palejuar në kuptim të paragrafit 2 të nenit 38 të Ligjit për Prokurorimin Publik është se kontrata publike kornizë nuk mund të zgjatet apo të ripërtrihet, dhe kushtet e saj nuk mund të ndryshojnë, ndërsa lidhja e aneks kontratës nuk e ka zgjatur, as ripërtrirë, e as ndryshuar asnjë kusht të kontratës kornizë, dhe se lidhja e aneks kontratës mund të jetë vetëm objekt diskutimi i menaxhimit administrativ, mirëpo asnjëherë objekt i kundërligjshmërisë”, tha avokati Shkoza.
Tutje, avokati Shkoza tha se prokuroria ka vlerësuar në mënyrë paushalle përfitimin e pretenduar për kinse 220 mijë euro, derisa vlera e tërësishme e punëve të kryera sipas tij është 146 mijë e 450 euro.
“Me gabime të tilla, me mungesën e provave kredibile në ndërlidhje të gjendjes faktike, prova që e vërtetojnë argumentimin juridiko penal, prokuroria ka dështuar të provoj ekzistimin e dyshimit të bazuar”, ka thënë Shkoza.
Ndërkaq, i akuzuari Ferati tha se hetuesia ka bërë një gabim, pasi kur ka bërë pyetje në Komisionin Rregullativ të Prokurorimit Publik, ka pyetur vetëm se a është në kundërshtim me kontratat kornizë lidhja e aneks kontratës, dhe asnjë pikë tjetër nuk e ka cekë.
Ndërsa, gjykatësi Rrahman Beqiri i tha të akuzuarit se tha se këto pretendime mund t’i paraqet në fazën e mbrojtjes duke i mbështetur në prova, e jo në fjalën hyrëse.
Në këtë seancë ishte paraparë dëgjimi i dëshmitares, Florije Salihi, por në mungesë së saj seanca është ndërprerë.
Lidhur me mungesën e saj gjykatësi Beqiri tha se dëshmitarja Salihu ka qenë e ftuar përmes emailit, dhe pasi e njëjta nuk e ka konfirmuar pranimin e ftesës, gjykata ka kontaktuar përmes telefonit me institucionin në të cilin punon dhe është kuptuar se dëshmitarja nuk punon më në Komisionin Rregullativ të Prokurorimit Publik.
Ndryshe, sipas aktakuzës së ngritur më 2 tetor 2023, Haxhimet Ferati akuzohet se me datën 19 nëntor 2014, në pozitën e menaxherit të prokurimit publik pranë Drejtorisë së Prokurimit, në Komunën e Mitrovicës, duke shfrytëzuar pozitën e tij dhe duke tejkaluar autorizimet e tij, me qellim të përfitimit të kundërligjshëm të një dobie pasurore për vete ose tjetrin.
Aktakuza thotë se, në kundërshtim me ligjin LPP nr. 04L-042, i akuzuari Ferati ka lidhur aneks- kontratë me Operatorin Ekonomik NTP “Tropik” me të cilin ka pasur kontratë kornize tri vjeçare që nga data 15 prill 2013 e vlefshme deri më 15 prill 2016, me kontratë bazë ka lidhur aneks- kontratën me datën 19 nëntor 2014 në vlerë prej 200 e 20 mijë euro në kundërshtim me nenin 38 të LPP, i cili nenë nuk lejon lidhjen e aneks-kontratës në kontratat kornize.
Me këto veprime, sipas aktakuzës i akuzuari Ferati ka kryer veprën penale “Keqpërdorim i pozitës apo autoritetit zyrtar”, nga neni 422, paragrafi 1 të Kodit Penal./BetimipërDrejtësi
