Nga Partia Demokratike e Kosovës po kërkojnë që vendi sa më parë të shkojë në zgjedhje.
Pas kryetarit Krasniqi, i cili tha se zgjedhjet e parakohshme do të mbahen në vitin 2024, edhe deputeti i kësaj partie, Ardian Kastrati, deklaroi se duhet t’u drejtohemi kutive të votimit pasi vendi është në mjerim total.
“Zgjedhje të parakohshme ne nuk kemi kërkua sivjet por kemi kërkuar në konsistencë gjatë këtij mandati sepse kjo Qeveri e ka vërtetu me keqeverisjen e saj me paaftësinë për me menaxhu edhe projektet më të vogla, po e katandis Kosovën në një mjerim total. Në zgjedhje duhet me shku sepse kjo qeveri përmes keq-qeverisjes po e bën vendin të pajetueshëm” deklaroi Kastrati për “Gazeta Blic”
Por si pritet të jetë rezultati i Partisë Demokratike të Kosovës nëse shkohet në zgjedhje të parakohshme?
Njohësi i zhvillimeve politike në vend, Arbnor Sadiku, tha për “Gazeta Blic” se PDK-ja do të dalë partia e tretë me 15%, me një rezultat jo shumë të mirë.
Sadiku potencoi se shkak për këtë është pasi liderët historik të kësaj partie janë në Hagë dhe s’e nuk janë kryer reformat e duhura në parti.
“PDK-ja del partia e tretë, me 15%, me një rezultat jo shumë të kënaqshëm. Kjo pasi që liderët historik i ka në Hagë, dhe në anën tjeter nuk ka kry reformat e duhura në parti. Nuk ka zgjedh as kryetarin e ri, pasi që zotit Krasniqi i ka skaduar mandati tashmë” deklaroi Sadiku.
