Vendimi i Bankës Qendrore për ndalimin e përdorimit të dinarit në Kosovë, ka ngjallur reagime të shumta nga ndërkombëtarët.
SHBA-të shprehën shqetësimin se kjo çështje mund të shkaktojë tensione të reja nga serbët në veri.
Kundër vendimit përpos Serbisë, u deklarua edhe Bashkimi Evropian e Franca.
Lidhur me këtë, shqetësimin e ndanë me ambasadorin amerikan në vend edhe ish koloneli i FSK-së, Afrim Veseli.
Ai në një prononcim për Gazeta Blic, thotë se me Kushtetutë dhe ligj e kemi vetëm monedhën e euros, por që vendimi i BQK-së është dashur të analizohet dhe të konsultohen aleatët ndërkombëtarë.
“I bashkangjitem shqetësimit të ambasadorit amerikan për dinarin, po zgjohemi në mëngjes dhe çdoherë po dëgjojmë lajme për një situatë tjetër, po na përsëriten ciklet e krizave të ndryshme. Sikur vitin e kaluar, edhe ky vit. Nuk ka asnjë qytetar të Kosovës që nuk është pro heqjes së dinarit nga përdorimi. Fatkeqësisht, sovraniteti i vendit nuk është shtrirë në mbarë territorin dhe përdorimi i dinarit si monedhë ka vazhduar gjithë këto vite. Pra, ne edhe me Kushtetutë dhe ligj kemi monedhë zyrtare vetëm euron. Mirëpo në këtë situatë, kur u nxor ky vendim i BQK-së, që nuk është risi sepse është në ligj dhe Kushtetutë, ndoshta është dashur të analizohej më mirë dhe të mos ketë nguti në këtë vendim, të riaktualizohej çështja e përdorimit të dinarit në pjesën veriore, pa konsultimin me aleatët dhe mos të shkakton kriza. Konsideroj, pasi që kemi paralajmërimit e Hovenierit dhe BE-së, kishte me qenë mirë që ky vendim të anulohet”, shprehet ai.
Ai thotë se Departamenti i Shtetit reagon për situata serioze dhe që mund të ketë problem, e kanë të bëjnë me mbrojtje të territorit të Kosovës.
“Kur kemi të bëjmë me SHBA-të, nuk mund t’iu flasim atyre për sovranitetin e Republikës, kur atë e mbrojmë bashkë me ta. Pra, edhe e kemi krijuar së bashku. SHBA-të, sikur Departamenti i Shtetit që reagoi, nuk reagojnë në çdo situatë. Ata reagojnë kur situatat janë shumë serioze dhe mund të ketë problem, në bazë të analizave të tyre, pra edhe çështjeve të sigurisë dhe mbrojtjes për territorin e Kosovës”, thekson Veseli për Gazeta Blic.
