Lideri i LDK-së, Lumir Abdixhiku, ka thënë se sot vizitoi Shqipërinë Sekretari Amerikan i Shtetit, ndërsa në Kosovën e zymtë prej popullizmit, SHBA-të na flasin për raportet më të ulëta historike, për lëkundje partneriteti e krizë komunikimi.
Ai përmes një postimi në Facebook, thotë se është i lumtur për ecjen e Shqipërisë, ndërsa Kosova është bërë peng i çmendurisë populliste.
Ai ka shtuar se nuk pret që Amerika t’i bëjë qeveritë në Kosovë, pasi këtë e bën populli i saj, derisa shton se tek ai ka besim.
Postimi i tij i plotë:
Sekretari Amerikan i Shtetit viziton Shqipërinë. Aty flet për numrin rekord të turistëve, për këngët e Duas, punën e Mira Muratit në ChatGPT, kualifikimin e Shqipërisë në Evropian e për partneritetin e jashtëzakonshëm në mes të dy shteteve mike.Vite më parë, një vizitë e tillë nuk do të ishte e mundur pa kapërcim në Prishtinë. Kosova, si destinacion ishte e natyrshme.
Sot, në të njëjtën orë e në të njëjtën ditë në Kosovën e zymtë prej popullizmit, SHBA-të na flasin për raportet më të ulëta historike. Për lëkundje partneriteti e krizë komunikimi.Jam i lumtur për ecjen e Shqipërisë. Në ekonomi, kulturë, turizëm, sport e diplomaci. Po na ikin me hapa të mëdhenj. Po e bëjnë mençur, si vend i NATO-s dhe me partnerë!
Por Kosova, shteti ynë është bërë peng i çmendurisë populliste. I duartrokisin përplasjes. E nxisin delirin. Mburren me gjithë terrin politik që na shoqëron tash e tre vjet.Nuk pres që Amerika të na bëjë qeveritë. Ata që kanë të tilla pritje – dhe sa kam kuptuar s’janë pak të tillë – nuk janë të destinuar për politikë. Kjo detyrë fisnike i takon vetëm popullit të Kosovës. Dhe tek populli i Kosovës kam besimin e plotë që do të japë përgjigje këtë vit. Sepse, si vend, si shtet, si popull, kemi detyrim ta bëjmë Kosovën më mirë – ekonomikisht, politikisht dhe me miq! Paradoksalisht, po aq sa Shqipëria fillimisht.
Lidhja Demokratike e Kosovës ka shtruar dorën e lidhjes tashmë!
