Gazetari, Parim Olluri, tha se Qeveria është duke krijuar një ‘oligark të ri’.
Ai tha se bëhet fjalë për Bujar Shabanin nga Kompania “Bageri”.
“Në Kuvend nuk ia përmendi Qeverisë askush pse është duke u krijuar një oligark i ri, siç ka preferu Vetëvendosja me i quajt kur ka qenë në opozitë. Që është Bujar Shabani i kompanisë “Bageri”, ka thënë Olluri në “Pressing” të T7.
Në dhjetor të vitit të kaluar, Gazeta Insajderi, kishte shkruar ekskluzivisht se si kompania “Bageri” kishte falsifikuar dokumentet e dy gjeodetëve duke i paraqitur sikur punëtorë të tyre për të ftuar tenderë.
Kjo kompani i kishte keqpërdorur të dhënat personale, duke krijuar dy kontrata false me emrat e dy gjeodetëve dhe kishte arritur që të fitojë dy kontrata për asfaltimin e rrugëve.
Një tender e kishte fituar në komunën e Ferizajt me vlerën 2 milionë e 472 mijë euro dhe një në Viti që kapte vlerën e 274 mijë eurove.
